Да жніўня 2025 года на вайне загінула каля 220 тысяч расіян — ацэнка «Медыязоны» і «Медузы»
Гэтая лічба не адлюстроўвае ўсе страты: далёка не пра кожную смерць становіцца вядома публічна.
Да жніўня 2025 года расійскія страты ў вайне з Украінай склалі каля 220 тысяч чалавек забітымі. Да такой высновы прыйшлі «Медуза» і «Медыязона», вывучыўшы даныя аб стратах па імянным спісе загінулых і па рэестры спадчынных спраў.
У імянным спісе загінулых на канец жніўня 2025 года — 125 681 чалавек. Журналісты вядуць яго па адкрытых крыніцах (некралогі, паведамленні ў СМІ і гэтак далей). Відавочна, што гэтая лічба не адлюстроўвае ўсе страты: далёка не пра кожную смерць становіцца вядома публічна.
Разлічыць рэальную колькасць загінулых магчыма дзякуючы гэтаму спісу і дзяржаўнаму рэестру спадчынных спраў.
Падчас працы з РСС (Рэестр спадчынных спраў) журналісты выявілі новы рэкорд мужчынскай смяротнасці ў лістападзе 2024 года — каля 3 тысяч чалавек на тыдзень.
Пакуль з упэўненасцю не можам сказаць, што страты ў канцы 2024 года сапраўды былі настолькі высокія — канец года знаходзіцца на той мяжы, дзе дакладнасць нашага разліку пачынае падаць.
Адно з магчымых тлумачэнняў — гэта тое, што з другой паловы 2024 года ў расійскія суды масава пачалі паступаць іскі аб прызнанні вайскоўцаў зніклымі без вестак або загінулымі.
Да пачатку жніўня ў судах аказалася каля 50 тысяч такіх заяў, якія звязаны з ваеннымі. Проста цяпер суды прызнаюць зніклымі або загінулымі больш за 250 чалавек кожны дзень, што супастаўна з колькасцю загінулых у дзень на фронце.
«Медыязона» падрабязна пісала пра гэты працэс: найчасцей гэтыя іскі падаюць прадстаўнікі Міністэрства абароны — ім неабходна выключыць зніклага падчас баявога задання (г.зн. фактычна загінулага) байца са спісаў асабовага складу.
Каментары