Еўрасаюз адказаў на патрабаванне Трампа адмовіцца ад расійскіх энергарэсурсаў
Еўрапейскі Саюз працягвае курс на паступовае, але поўнае выцісканне расійскіх энергарэсурсаў са сваіх рынкаў. Пра гэта паведаміла прадстаўніца Еўрапейскай камісіі Паўла Пінью, каментуючы для «Радыё Свабода» патрабаванне прэзідэнта ЗША Дональда Трампа да еўрапейскіх краін спыніць імпарт расійскага газу і нафты.
Еўрачыноўніца падкрэсліла, што працэс пачаўся яшчэ некалькі гадоў таму, з пачатку вайны ва Украіне, і цяпер Еўрасаюз мае дакладную «дарожную мапу» і заканадаўчыя прапановы.
Паводле слоў Паўлы Пінью, гаворка ідзе пра планавую і паслядоўную адмову ад усіх відаў расійскага выкапнёвага паліва, у тым ліку ад астатніх паставак газу, што яшчэ трапляюць у краіны ЭС.
План Еўрасаюза прадугледжвае поўнае спыненне імпарту расійскага газу і нафты да канца 2027 года. Ён быў распрацаваны задоўга да таго, як Трамп паставіў гэта ўмовай для ўвядзення ЗША новых «сур’ёзных» санкцый супраць Расіі.
Еўракамісія таксама паведаміла, што паскоранае скарачэнне закупак расійскіх энергарэсурсаў можа ўвайсці ў наступны, 19-ы пакет санкцый Еўрасаюза, які цяпер рыхтуецца.
Прэс-сакратар Еўракамісіі Олаф Гіл адзначыў, што сярод магчымых захадаў абмяркоўваюцца не толькі паскарэнне адмовы ад расійскіх нафты і газу, але і перакрыццё схемаў з удзелам ценявога флоту ды трэціх краін, якія выкарыстоўваюцца для абыходу дзейных абмежаванняў. Пры гэтым ён падкрэсліў, што Брусель не будзе каментаваць выказванні Трампа ў сацыяльных сетках, а будзе засяроджвацца на ўласнай працы.
Днямі Дональд Трамп заявіў, што Вашынгтон увядзе дадатковыя санкцыі супраць Масквы толькі ў тым выпадку, калі ўсе краіны НАТА спыняць закупкі расійскай нафты.
У сваю чаргу, прэзідэнт Еўрапейскай рады Антоніу Коста ў пачатку верасня паведаміў, што за апошнія гады імпарт расійскіх нафты і газу ў ЭС ужо знізіўся на 80%. Пры гэтым ён адзначыў, што асноўным спажыўцом астатніх аб’ёмаў застаецца Венгрыя.
Яшчэ ў чэрвені Еўракамісія прапанавала план поўнай адмовы ад расійскіх нафты і газу, у тым ліку ад звадкаванага газу, з канчатковым тэрмінам да 2027 года.
Трамп упершыню назваў Расію агрэсарам
Трамп паставіў новыя ўмовы для ўвядзення «маштабных» санкцый супраць Расіі
ЗША прапанавалі краінам G7 пачаць канфіскацыю замарожаных рэзерваў Расіі
У Трампа «хутка заканчваецца» цярпенне, ён анансаваў новыя санкцыі супраць Расіі
У ЗША заявілі, што могуць абрынуць эканоміку Расіі. Але трэба дапамога Еўропы
Каментары
Няхай Еўропа сама вырашае свае пытанні з Расеяй, якую сама ж корміць грашыма.