Pamočnik Łukašenki atrymaŭ nizkuju pasadu: piać faktaŭ pra Valancina Rybakova

Valancin Rybakoŭ pryznačany namieśnikam ministra zamiežnych spravaŭ. Adpaviednaje rašeńnie źmiaščajecca ŭ pastanovie Savieta Ministraŭ ad 9 studzienia № 18, paviedamlaje ahienctva BIEŁTA.

8 studzienia Alaksandr Łukašenka vyzvaliŭ Rybakova ad pasady pamočnika prezidenta. I adrazu adbyłosia takoje, davoli nizkaje jak dla pamočnika, pryznačeńnie. Z pamočnikaŭ navat kiraŭnikami Administracyi rabilisia (Makiej) — a tut namieśniki ministra. Viedama, u pierśpiektyvie z pasady namieśnika lohka pierasieści ŭ kresła ministra. Ale tolki ŭ pierśpiektyvie.

Kresła dla Rybakova vyzvaliŭ Siarhiej Alejnik, jaki z pasady namieśnika pierajedzie ŭ Łondan pasłom.

Pryznačeńnie Rybakova vyjaŭlaje jahonuju suviaź ź ciapierašnim ministram Uładzimiram Makiejem. Rybakoŭ zaŭždy trymaŭsia low profile, tamu asablivych faktaŭ pra jaho nie nakapaješ.

Ale, uličvajučy ahulnuju atmaśfieru ŭ sistemie, kali čałaviek z dostupam da cieła nie vysłužyŭsia tak, kab jaho pastavili na niejkuju adkaznuju i hrašovuju pasadu — naprykład, u śpiecsłužbach, ŚMI ci «pa rasijskaj, naftavaj častcy», to taki čałaviek zasłuhoŭvaje ŭvahi ŭžo samim faktam svajho niekarjeryzmu.

1. Suviazny

Sajt WikiLeaks nazyvaŭ Valancin Rybakoŭ suviaznym Minska sa Złučanymi Štatami. WikiLeaks nadrukavaŭ ź dziasiatak depieš, dzie ŭzhadvajecca imia Rybakova. Mienavita praź jaho išli kantakty aficyjnaha Minska z pasolstvam ZŠA. Takija ž kantakty jon, musić, mieŭ i ź jeŭrapiejcami. Mienavita jon farmulavaŭ pazicyju Minska pa sankcyjach ES i, z druhoha boku, pa farmalnych momantach adnosin u miežach SND. Z druhoha boku, z materyjałaŭ WikiLeaks vynikała, što rašeńni prymaŭ asabista Łukašenka, a Rybakoŭ tolki danosiŭ ich.

2. Kopija Makieja

Karjerny šlach Valancina Rybakova niečym nahadvaje prychod Makieja. Taksama dypłamat, skončyŭ Linhvistyčny. Pracavaŭ pasłom pa asablivych daručeńniach. Ad 2006 pamočnik Łukašenki. Pryčym na publičnyja roli nikoli nie vychodziŭ. Zusim jak Makiej u svoj čas. Byłyja kalehi Rybakova kažuć, što «jon z Makiejem adnaho pola jahady». Adznačajecca, što Rybakoŭ vydatny pierakładčyk, što lohka tłumačyć dostup da kiraŭnika krainy.

3. Intelektuał

«Ź im cikava pić harbatu, — skazaŭ mnie niejak čałaviek, jaki razam z Rybakovym pracavaŭ u Ministerstvie zamiežnych spravaŭ. — Znojdziecca, pra što havaryć», — dadaje jon. Choć druhija ludzi nazyvali Rybakova intelektualna trochi słabiejšym za Makieja.

4. Inkohnita

U siecivie niama źviestak pra datu i miesca naradžeńnia Valancina Rybakova, amal niama jahonych fatahrafij. I heta pra pamočnika kiraŭnika dziaržavy, pryznačanaha namieśnikam ministra zamiežnych spravaŭ. Takoje ŭražańnie, što krainaj kirujuć sapraŭdnyja Štyrlicy. Kali sutykaješsia z takimi faktami, razumieješ, čamu ŭ śviecie, u tym liku i ŭ biznes-kołach, Biełaruś razam z Mjanmaj nazyvajuć a highly secretive regime.

5. Who are you?

Adzinaja ź dźviuch dastupnych fatahrafij Rybakova — z AANaŭskaha pasiadžeńnia. Valentin Rybakov — hłasit šylda pierad čałaviekam z kiemlivymi, chitravatymi, iraničnymi vačyma. A nie Valancin Rybakou, jak toje rekamiendujuć praviły tranślitaracyi ź biełaruskaj movy, zaćvierdžanyja Akademijaj navuk. Kalka z rasiejskaj, na žal.

• 1
• 0
• 0
• 0
• 0
• 0
• 0
• 0