Ukraina dapuścić małdaŭskich siłavikoŭ da kantrolu ŭkrainska-prydniastroŭskaj miažy
Na pačatku listapada Kijeŭ i Kišynioŭ padpisali pahadnieńnie ab uviadzieńni z studzieni 2016 hoda supolnaha kantrolu nad ukrainska-prydniastroŭskaj miažoj. Pieršym punktam propusku, u jakim płanujecca raźmiaścić małdaŭskich siłavikoŭ, stanie KPP «Kučurhan». «Hety ŭčastak miažy pavinien stać nadziejnaj zasłonaj ad kantrabandy i niezakonnaha pieramiaščeńnia tavaraŭ i kamfortnym dla žycharoŭ pamiežnaj zony, ich sacyjalnych, siamiejnych i siabroŭskich kantaktaŭ», — zajaviła načalnica Adeskaj mytni Julija Marušeŭskaja.
«Na praktycy realizacyja inicyjatyvy Małdovy i Ukrainy budzie aznačać, što tavary dla prydniastroŭskich pradpryjemstvaŭ padvierhnuty patrojnamu mytnamu kantrolu, da ich u poŭnaj miery buduć prymianiacca patrabavańni małdaŭskaha zakanadaŭstva», — zajaviŭ vykanaŭca abaviazkaŭ ministra zamiežnych spravaŭ niepryznanaj respubliki Vital Ihnaćjeŭ.
Paśla pryniaćcia novych zachadaŭ kantrol Kišyniova nad Prydniastroŭjem uzmacnicca.
Varta adznačyć, što ekanamičny stan Prydniastroŭja płačeŭny. Najaŭnaść rasijskich subsidyj u vyhladzie tannaha hazu i nafty kansiervuje nieefiektyŭnyja pradpryjemstvy. Akramia taho, Maskva zabaraniaje Tyraspala stvaryć režym najbolšaha spryjańnia ŭ handli ź Jeŭrasajuzam, što pazbaŭlaje terytoryju naturalnaha rynku zbytu. U vyniku, pavodle źviestak statkamiteta Prydniastroŭja, za pieršyja dziesiać miesiacaŭ 2015 hoda abjom ekspartu z Prydniastroŭja skaraciŭsia amal na 18% da 460 młn dalaraŭ, prytym što impart składaje 893 młn dalaraŭ.
Nie vyklučana, što ŭ adzin z nastupnych hadoŭ ułady rehijona mohuć pasprabavać narmalizavać adnosiny z Kišyniovam i dałučycca da ŭmovaŭ Asacyjacyi ź ES, jakuju padpisała Małdova.
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku47
Kamientary