Pravaabaroncy pryznali palitviaźniami drahičynskaha žurnalista i eks-milicyjaniera
Žurnalista internet-vydańnia «Pieršy rehijon» Siarhieja Hardzijeviča zatrymali 22 śniežnia pa darozie z Drahičyna ŭ Brest. Paźniej u jaho kvatery adbyŭsia pieratrus, a jon byŭ zatrymany ŭ jakaści padazravanaha pa kryminalnaj spravie pa art. 368 KK (abraza prezidenta). 25 śniežnia ŭ dačynieńni da Siarhieja Hardzijeviča była abranaja miera strymańnia ŭ vyhladzie chatniaha aryštu.
4 śniežnia pry sprobie vyjechać za miežy Biełarusi byŭ zatrymany Dźmitryj Kułakoŭski, jaki paźniej byŭ źmieščany pad vartu ŭ SIZA Žodzina ŭ miežach zaviedzienaj u dačynieńni da jaho kryminalnaj spravy pa art. 369 KK (abraza pradstaŭnika ŭłady).
Dźmitryj Kułakoŭski byŭ načalnikam kryminalnaha vyšuku Zavodskaha RUUS Minska, adkul zvolniŭsia paśla prezidenckich vybaraŭ u suviazi ź niazhodaj ź dziejańniami ŭłady. U kastryčniku jon byŭ zatrymany supracoŭnikami Słužby ŭnutranaj biaśpieki MUS i amal miesiac pravioŭ u CIP, dzie adbyvaŭ administratyŭnyja aryšty za nibyta niepadparadkavańnie patrabavańniam słužbovaj asoby.
«U suviazi z hetym, padtrymlivajučy raniej vykazanuju nami ŭ zajavie ad 22 śniežnia 2020 h. pazicyju adnosna dekryminalizacyi dyfamacyi, spynieńnia pieraśledu i vyzvaleńnia ŭsich palitviaźniaŭ, asudžanych za paklop ci abrazu słužbovych asob, dziaržaŭnych čynoŭnikaŭ i prezidenta, źniavahu dziaržaŭnych simvałaŭ, a taksama ŭličvajučy toje, što Siarhiej Hardzijevič i Dźmitryj Kułakoŭski izalavanyja (pazbaŭleny voli) da suda, my pryznajem ich pieraśled palityčna matyvavanym, a ich samich, u adpaviednaści z p. 3.1(a) Kiraŭnictva pa vyznačeńni paniaćcia «palityčny źniavoleny», palityčnymi źniavolenymi», — havorycca ŭ zajavie pravaabaroncaŭ. Jany patrabujuć nieadkładnaha vyzvaleńnia Siarhieja Hardzijeviča i Dźmitryja Kułakoŭskaha.
Usiaho ŭ Biełarusi ŭžo 169 palitviaźniaŭ.
Kamientary