Vodzić mašynu, majstruje pa drevie i zapuskaje dron. Jak invalid-vazočnik uładkavaŭ svajo žyćcio ŭ vioscy pad Słuckam
Andrej Damarad u 16 hadoŭ zvaliŭsia z dachu i nie zmoh chadzić z-za traŭmy. Niahledziačy na invalidnaść, žychar Słucka viadzie aktyŭny ład žyćcia — vodzić mikraaŭtobus, majstruje i vyrazaje z dreva, zdymaje navakolle z dapamohaj drona. Andrej raspavioŭ kurjer.info, jak uładkoŭvaje svoj pobyt u vioscy, znachodzić novyja zaniatki i zachapleńni.
Ciapier Andreju 41 hod. Jon naradziŭsia ŭ vioscy Viasieja, da piataha kłasa žyŭ tam. Potym siamja pierajechała ŭ Słuck, žyli ŭ mikrarajonie «Cukrovy». U 16 hadoŭ Andrej, padajučy z dachu, niaŭdała pryziamliŭsia i atrymaŭ traŭmu pazvanočnika.
«Paśla traŭmy pačałosia inšaje žyćcio — u vazku, — kaža mužčyna. — Kali nie stała mamy, zachaciełasia źjechać žyć u viosku. Zastavacca ŭ «špakoŭni» ŭžo nie było sił. Piać hadoŭ tamu pierabraŭsia ŭ Viasieju.
Užo paśla pierajezdu ŭ viosku pačalisia prablemy z sustavami, mnie daviałosia amputavać nohi. Paśla apieracyi jašče ni razu nie kłaŭsia ŭ balnicu, a da jaje davodziłasia rehularna špitalizavacca.
Ciapier u vioscy ŭładkoŭvaju ŭsio pad siabie. Tut cišynia i zručniej. Dźviery adčyniŭ — i ty ŭžo na vulicy, a ŭ kvatery — lift, leśvica, vysokija i niazručnyja pandusy. Kali ruki słabyja, to i nie zajedzieš. Tut mahu navat źjeździć u les na maleńkaj «Ace», paźbirać hryby na ŭskrainie. U Viasieju pryjazdžajuć u hości siabry.
Jak vučyŭsia kiravać mašynaj
U 17 hadoŭ baćki kupili mnie mašynu. Advučyŭsia ŭ aŭtaškole ŭ Vilejcy, tam była hrupa dla ludziej ź invalidnaściu. Atrymaŭ paśviedčańnie kiroŭcy. Letaś dadaŭ sabie jašče adnu katehoryju — mahu kiravać elektramabilem.
Z 17 hadoŭ u mianie było mašyn piać. Ciapier u mianie mikraaŭtobus. Ja sam pieraabstalavaŭ jaho pad ručnoje kiravańnie. Pryncyp — jak u matacykle. Adnoj rukoj vyciskaješ sčapleńnie, tarmoziš, hazuješ. Heta vielmi zručna.
Mnie ŭsio cikava, naprykład, zvarka. Niejak u mianie była stareńkaja Mazda. Razabrali jaje, pierafarbavali ŭ aranžavy. Jeździŭ pa Słucku z muzykaj.
Chaču sa svajho busa zrabić aŭtadom, kab možna było ŭziać z saboj ježy i źjechać na paru dzion u padarožža. Chaciełasia b adpravicca na Narač, tamu što ŭ škole chadzili tudy ŭ pachod.
Jak uładkavaŭ pobyt u vioscy
U domie ja žyvu adzin. U horadzie byvaju časta, ale ŭ kramy sam nie chadžu, dy i ŭ vioscy nie abstalavana dla vazočnikaŭ. Z praduktami i inšym nieabchodnym albo dapamahajuć siabry, albo siastra — telefanuje, pytajecca, što treba kupić, pryvozić. Jašče zaŭsiody hatovy vyručyć susied — zajechać u mašynu i vyjechać, dy i pa inšych pytańniach.
Hatuju sabie sam, u asnoŭnym u multyvarcy. Hladžu recepty ŭ internecie. Admoviŭsia ad hazu. U domie ŭsio na elektryčnaści, jak i aciapleńnie, — dziadźka zrabiŭ ciopłyja padłohi. Kali ŭ vioscy adklučajuć elektryčnaść, to heta ŭžo prablema. Ale tapić pieč fizična nie atrymlivajecca. A kab pravieści ŭ dom haz, tolki za prajekt treba zapłacić 1500 rubloŭ.
Siastra zajmajecca pasadkami, aharodam. Chacieŭ zrabić sabie krytuju terasu, ale pakul na heta niama hrošaj.
Jak zachapiŭsia raźboj pa drevie i stalarstvam
U škole ŭ mianie byŭ nastaŭnik pa pracy Alaksandr Fiodaravič. Pa sumiaščalnictvie pracavaŭ na turbazie, vadziŭ nas u pachody. Kali ja apynuŭsia ŭ vazku, chtości raspavioŭ jamu pra heta, i Alaksandr Fiodaravič pryvioz mnie dadomu razcy i knihi, kab ja vučyŭsia raźbie. Pavoli, ležačy ŭ łožku, pačaŭ asvojvać hetaje ramiastvo.
Potym mnie bolš spadabałasia rabić meblu. Asvoiŭ navat kuchonnyja stały i taburetki. Potym pačalisia prablemy sa zdaroŭjem, i zakinuŭ pracu z drevam.
Kali staŭ adčuvać siabie lepš, znoŭ zaniaŭsia stalarnaj spravaj. Zaraz ja abstaloŭvaju majsterniu ŭ haražy pobač z domam. Treba pryvieści da ładu takarny stanok, pastavić rassoŭnyja stały, kab vypiłoŭvać bujnyja rečy. Ciapier rablu łyžki, škatułki, kurylnyja lulki.
Kali sadžusia majstravać, zabyvaju pra ŭsio — zdajecca, tolki pačaŭ, a ŭžo 8 viečara. U płanach zrabić nabor z dreva: talerki, spodki, videlcy, łyžki i kubki. Materyjał znajści nie prablema, u hetym dapamahajuć siabry, ale jon pavinien być suchi. Kali dreva nie dasušyš, to vyrab treśnie.
Chacieŭ by zdymać videa dla sacyjalnych sietak abo YouTube pra toje, jak majstruju i pracuju z drevam, ale patrebny štatyŭ i inšaje abstalavańnie. Tak što heta ŭ płanach.
Jak źjaviŭsia dron
Nahledzieŭsia videa na YouTube, jak ludzi zdymajuć dronam. Zahareŭsia — kupiŭ sabie taki aparat. Moj dron važyć 249 hramaŭ, tak što dazvołu na paloty nie patrabujecca. Zdymaju šmat, ale manciravać pakul nie atrymlivajecca. Mała kudy vyjazdžaju, a ŭ adnym i tym ža miescy lotać niecikava. Svaju viosku nazdymaŭ užo z usich rakursaŭ.
Jak nie adčajvacca i znajści siabie
Vialikuju rolu adyhryvaje padtrymka rodnych i siabroŭ. Baćki ni razu nie skazali: «Ty nie chodziš. Navošta tabie mašyna?». Naadvarot, usio zrabili, kab u mianie atrymałasia. Siabry zaŭsiody padtrymlivali. Ciahnuli mianie na turniki padciahvacca.
I ad samoha čałavieka šmat zaležyć. Byvaje, pravalvajusia ŭ stan: «Aj, nadakučyła ŭsio!». Ale adčajvacca praściej za ŭsio: skazać usim, što ty słaby, lažyš, i vakoł ciabie ŭsie pavinny biehać. Ja, napeŭna, tamu i źjechaŭ žyć u viosku, kab być samastojnym. I abaviazkova treba znajści sabie zaniatak. Ja taksama nie adrazu pryjšoŭ da takarnaha stanka, šmat razoŭ vylatała daŭbieška ŭ łob. Hałoŭnaje — nie adčajvacca, stavić metu i iści napierad».
Ciapier čytajuć
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała32
Kamientary