Cichanoŭskaja praviała važnyja sustrečy z palitykami Vialikabrytanii
Śviatłana Cichanoŭskaja praciahvaje svoj vizit u Vialikabrytaniju. Paśla sustrečy z byłym premjer-ministram Borysam Džonsanam jana sustrakajecca z tymi palitykami, jakija vyznačajuć źniešniuju palityku hetaj dziaržavy na hety momant.
Učora Śviatłana Cichanoŭskaja sustrełasia ź ministram zamiežnych spraŭ Vialikabrytanii Džejmsam Klevierli i ministram pa spravach Jeŭropy Lea Dokierci.
Cichanoŭskaja zaklikała abodvuch ministraŭ źviarnuć uvahu na situacyju ź biełarusami, jakija žyvuć u Vialikabrytanii. Zaraz mnohija ź ich sutyknulisia z prablemaj afarmleńnia nieabchodnych dakumientaŭ i varta było b paspryjać, kab jany mieli mahčymaść adnaŭlać svaje dakumienty i dazvoły na žycharstva ŭ Vialikabrytanii, nie viartajučysia ŭ Biełaruś. Taksama Cichanoŭskaja prasiła, kab Vialikabrytanija vydavała vizy biełarusam, niahledziačy na ŭsie składanaści.
Akramia taho, padčas hetaj sustrečy abmiarkoŭvali padtrymku Mižnarodnaj płatformy zboru dokazaŭ złačynstvaŭ Łukašenki, jakaja ŭžo sabrała bolš čym 15 tysiačaŭ dakumientaŭ.
Siońnia Cichanoŭskaja abmierkavała ź lidarami apazicyjnaj Lejbarysckaj partyi Vialikabrytanii padtrymku niezaležnych biełaruskich prafsajuzaŭ.
Razmova išła taksama išła pra sumiesnyja dziejańni dla pryciahnieńnia režymu Łukašenki da adkaznaści za represii ŭ ramkach Mižnarodnaj arhanizacyi pracy.
Taksama Śviatłana Cichanoŭskaja sustrełasia z kiraŭnictvam abiedźviuch pałat brytanskaha parłamienta.
Tut havaryli siarod inšaha pra apošnija palityčnyja prysudy ŭ Biełarusi i dyviersiju na aeradromie ŭ Mačuliščach pad Minskam 26 lutaha.
Urešcie Cichanoŭskaja vystupiła na słuchańniach u Kamitecie pa mižnarodnych adnosinach i abaronie Pałaty łordaŭ.
Padčas vystupu biełaruskaja demakratyčnaja lidarka zaklikała brytanskich palitykaŭ vypracavać dakładnuju i skaardynavanuju stratehiju pa Biełarusi, raspačać mižnarodnaje sudavodstva suprać biełaruskaha režymu za saŭdzieł u vajnie i za złačynstvy suprać čałaviečnaści, padtrymlivać biełaruskuju hramadzianskuju supolnaść, ŚMI i pravaabarončyja arhanizacyi, a taksama partyzan i dobraachvotnikaŭ va Ukrainie.
Na 9 sakavika pryznačanyja słuchańni pa situacyi ŭ Biełarusi ŭ brytanskaj Pałacie łordaŭ.
Čytajcie taksama:
Džonsan — Cichanoŭskaj: My zachaplajemsia advahaj biełaruskich vajaroŭ
Kamientary