Za chabar aryštavali kiraŭnika Aršanskaha miasakansiervavaha kambinata. Dva miesiacy tamu jon prymaŭ na zavodzie premjera Turčyna
Milicyja paviedamiła pra zatrymańnie 44‑hadovaha žychara Barysava, jaki ŭznačalvaŭ adno ź miasapierapracoŭčych pradpryjemstvaŭ Viciebskaj vobłaści. Jak vyśvietliła «Naša Niva», havorka idzie pra kiraŭnika Aršanskaha miasakansiervavaha kambinata Paŭła Rynzaka.
Paŭłu Rynzaku 44 hady, jon rodam z Barysava. Usia jahonaja karjera źviazanaja z charčovaj pramysłovaściu i handlem.
Raniej Rynzak pracavaŭ namieśnikam načalnika na Barysaŭskim kambinacie chlebapraduktaŭ, mieŭ dačynieńnie da Barysaŭskaha miasakambinata, a paźniej byŭ namieśnikam dyrektara i vykanaŭcam abaviazkaŭ dyrektara na Słuckim miasakambinacie.
U 2022 hodzie mužčyna taksama na karotki čas rehistravaŭ IP u Barysaŭskim rajonie dla akazańnia kamiercyjnych pasłuh.
Apošnim časam Rynzak pracavaŭ kiraŭnikom Aršanskaha miasakansiervavaha kambinata, jaki znachodzicca pad kiravańniem mahutnaha ahrakambinata «Dziaržynski» i rychtavaŭsia da poŭnaha ŭvachodžańnia ŭ jaho skład.
Jašče ŭ žniŭni 2026 hoda Pavieł Rynzak asabista sustrakaŭ na pradpryjemstvie premjer-ministra Alaksandra Turčyna i razdavaŭ kamientary dziaržaŭnaj presie — chvaliŭsia novymi aŭtamatyzavanymi linijami, pierachodam dziciačaha charčavańnia ź blašanak-«šajbačak» na šklany posud i płanami vypuskać karmy dla žyvioł u paŭč-pakietach.
Pra zatrymańnie top-mieniedžara 22 kastryčnika paviedamiła pres-słužba MUS: Rynzaka ŭziali jaho pry atrymańni chabaru. Pavodle źviestak śledstva, kiraŭnik pradpryjemstva zabiaśpiečyŭ pryvatnaj firmie pieramohu ŭ pracedury zakupak transpartnych pasłuh dla patreb kambinata.
Suprać Paŭła Rynzaka zaviali kryminalnuju spravu za atrymańnie chabaru, siłaviki šukajuć inšyja epizody jahonaj dziejnaści.
«Naša Niva» — bastyjon biełaruščyny
PADTRYMAĆ
Kamientary