Dziaržbiaśpieka Litvy: «Naš dom» Karač štučna stvaraje ŭmovy, kab biełarusy, što nie adpaviadajuć kryteryjam mižnarodnaj abarony, atrymlivali VNŽ u Litvie

Pavodle acenki Departamienta dziaržaŭnaj biaśpieki (DDB) Litvy, hramadskaja ŭstanova «Naš dom» («Mūsų namai»), jakuju ŭznačalvaje Volha Karač, stvaraje spryjalnyja ŭmovy dla taho, kab u Litvu traplali i lehalizavalisia asoby, jakija supracoŭničajuć sa śpiecsłužbami varožych krain.

Pra heta havorycca ŭ zajavie, jakuju 19 kastryčnika apublikavała Ministerstva ŭnutranych spraŭ Litvy.

DDB apisvaje miechanizm tak: ułady Biełarusi pryznali «Naš dom» ekstremisckaj arhanizacyjaj, i mienavita praz hety status štučna stvarajucca abstaviny, kab źviazanyja z arhanizacyjaj biełarusy, jakija nie adpaviadajuć kryteryjam mižnarodnaj abarony, atrymlivali dazvoły na žycharstva ŭ Litvie.

Pavodle DDB, takaja schiema spryjaje złoŭžyvańniu pravam na mižnarodnuju abaronu.

Faktyčna havorka idzie pra toje, što luby biełarus, jaki navat nie maje palityčnaha pieraśledu na radzimie, moža paŭdzielničać u mitynhu ŭ Vilni sa ściaham «Našaha doma», a paśla padać dakumienty na atrymańnie palityčnaha prytułku ŭ Litvie — z arhumientam, što ciapier jamu pahražaje kryminalny pieraśled za supracoŭnictva z «Našym domam». I litoŭskaja dziaržava pavinna brać takich ludziej pad achovu, vydajučy im biesterminovy pastajanny dazvoł na žycharstva.

Samu Karač litoŭskija śpiecsłužby ličyć pahrozaj dziaržaŭnaj biaśpiecy. Pavodle acenki siłavikoŭ, jana aktyŭna raspaŭsiudžvaje ŭ sacyjalnych sietkach infarmacyju, jakaja adpaviadaje naratyvam rasiejskaj prapahandy: dyskredytuje Litvu, prymianšaje padtrymku Ukrainy i raspalvaje niedavier da litoŭskich dziaržaŭnych instytutaŭ. DDB taksama śćviardžaje, što ŭ 2015—2019 hadach Karač supracoŭničała z rasijskimi śpiecsłužbami.

Adnak vysłać Karač ź Litvy nie mohuć, bo vysyłka ŭ Biełaruś pahražała b jaje biaśpiecy. Pavodle zakona, takim zamiežnikam, jakich nielha vysłać, vydajecca dazvoł na žycharstva na termin da adnaho hoda, jaki daje i prava pracavać.

«Situacyja i absurdnaja: našy vyviedvalnyja instytucyi kanstatujuć, što kankretnaja asoba stvaraje pahrozu nacyjanalnaj biaśpiecy, ale vysłać jaje nie dazvalaje mižnarodnaje prava, tamu dziaržava sama musić vydać takoj asobie dazvoł tut žyć i pracavać. Bolš za toje, za vydaču takoha dazvołu płacić nie sama asoba, čyja dziejnaść škodzić našaj dziaržavie, a litoŭskija padatkapłatniki», — zajaviŭ ministr unutranych spraŭ Litvy Marcinas Kacialinas.

Pavialičyć

Kacialinas abviaściŭ šerah krokaŭ. Jon źvierniecca ŭ adpaviednyja orhany, kab tyja dali jurydyčnuju acenku dziejnaści Karač i «Našaha doma», jakaja, pavodle ministerstva, supiarečyć intaresam nacyjanalnaj biaśpieki Litvy. Budzie aceniena, jakija miery možna pryniać u dačynieńni da jurydyčnych asob, źviazanych z asobami, što stvarajuć pahrozu nacyjanalnaj biaśpiecy. Kali dla hetaha buduć praduhledžanyja zakonam padstavy, sud moža vyrašyć i pytańnie likvidacyi jurydyčnaj asoby.

Departamient mihracyi pavinien pravieryć, ci niama ŭ Karač i padobnych piersanažaŭ hramadzianstva inšych krain, prava žyć u inšych dziaržavach abo inšych zakonnych mahčymaściaŭ vyjechać u biaśpiečnuju treciuju krainu.

Pavodle ministerstva, jurydyčna vysyłka ŭ biaśpiečnuju treciuju krainu mahčymaja, adnak dla prymusovaj vysyłki patrebnyja pravavaja padstava i dziaržava, jakaja pahodzicca takuju asobu pryniać.

«Litva — nie toje miesca, dzie možna złoŭžyvać pravavoj abaronaj i jašče škodzić biaśpiecy našaj dziaržavy. Kali my nie možam vysłać asobu, jakaja dziejničaje suprać našaj dziaržavy, heta nie značyć, što my pavinny stvarać joj umovy i ŭsie mahčymaści tut žyć. Naša dziaržava nie biaśsilnaja i takoj być nie moža», — zajaviŭ Kacialinas.

Čytajcie taksama: 

«Možna atrymlivać hrošy pad baraćbu za pravy transhiendaraŭ, možna — suprać ich». Volha Karač — pra žyćcio ŭ Vilni, chvaroby i dachody

Chto takaja Volha Karač, jakaja choča padsiadzieć Cichanoŭskuju?

• 23
• 0
• 4
• 8
• 2
• 0
• 1
• 0