Złučanyja Štaty adkładuć na miesiac uviadzieńnie impartnych pošlin na kanadski ekspart u ZŠA, abviaściŭ u paniadziełak Donald Tramp. Zajava była zroblena za niekalki hadzin da taho, jak jaho ŭkaz pavinien byŭ ustupić u siłu, zhodna ź jakim tavary z Kanady abkładalisia b 25-pracentnaj impartnaj pošlinaj, piša Radyjo Svaboda.
Svajo rašeńnie Donald Tramp pryniaŭ paśla telefonnaj razmovy z premjer-ministram Kanady Džaścinam Trudo, jaki paabiacaŭ uvieści dadatkovyja miery biaśpieki na kanadska-amierykanskaj miažy.
«Kanada pahadziłasia harantavać biaśpieku našaj paŭnočnaj miažy i pakłaści kaniec śmiarotnamu patoku narkotykaŭ, takich jak fientanił, u našu krainu», — paviedamiŭ prezident Tramp na svajoj staroncy ŭ sacyjalnaj sietcy.
Premjer-ministr Trudo paśla razmovy z prezidentam ZŠA zajaviŭ, što Kanada maje namier pryniać dadatkovyja miery pa achovie miažy z ZŠA, pavialičyŭšy kolkaść pamiežnaj słužby na 10 tysiač čałaviek, nakiravaŭšy na achovu miažy viertaloty, pašyryŭšy supracoŭnictva z amierykanskim bokam i pryznačyŭšy čynoŭnika, adkaznaha za baraćbu z kantrabandaj fientaniłu.
Na realizacyju novaha płana achovy miažy vyłučany adzin miljard trysta miljonaŭ dalaraŭ. Kanada taksama ŭklučyć narkakarteli ŭ śpis terarystyčnych arhanizacyj.
Dvumia dniami raniej prezident ZŠA Donald Tramp padpisaŭ prezidenckija ŭkazy, jakimi praduhledžvajecca ŭviadzieńnie 25-pracentnaj impartnaj pošliny praktyčna na ŭvieś kanadski i mieksikanski impart u Złučanyja Štaty. Prezident Tramp matyvavaŭ svajo rašeńnie tym, što Mieksika i Kanada nie spynili patok nielehalnych mihrantaŭ praź miažu z ZŠA i nie pryniali nieabchodnych mier dla pierachopu narkotykaŭ, asabliva fientaniłu.
U paniadziełak, za niekalki hadzin da ŭstupleńnia prezidenckich ukazaŭ u siłu, było abvieščana ab dasiahnieńni pahadnieńnia pamiž prezidentam Trampam i prezidentam Mieksiki Kłaŭdyjaj Šejnbaum, u ramkach jakoha ŭviadzieńnie pošlin budzie adkładziena na miesiac.
Rašeńnie Trampa ab pošlinach u 10% na impart z Kitaja, taksama abnarodavanaje 1 lutaha, zastajecca ŭ sile.
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu11
Kamientary
Ciapier šulcy na čarzie.