Uradžencu Biełarusi, jaki ledź nie źbiŭ na skutary ŭ Rymie viadomaha śviatara, dali try hady turmy
Uradžencu Biełarusi, jaki letam 2023 hoda ŭ Rymie ledź nie źbiŭ na skutary viadomaha śviatara — zmahara z narkamafijaj, dali 3 hady turmy. Pra heta paviedamlaje «Biełaruś i śviet» sa spasyłkaj na italjaskija ŚMI.
Zdareńnie adbyłosia 29 žniŭnia 2023 hoda na vulicy Via del Archieałodžyja, jakaja znachodzicca ŭ sumna viadomym narkahandlem rajonie Tor Beła Manaka na ŭskrainie italjanskaj stalicy.
Śviatar don Antonia Kałučya pravodziŭ čarhovy marš u padtrymku zakonnaści, padčas jakoha, jak i zaŭsiody, ahitavaŭ žycharoŭ zmahacca z raspaŭsiudžvańniem psichatropaŭ, zaklikaŭ moładź syści z vulic, zajmacca sportam, zarablać lehalna.
U niejki momant pry pierasiačeńni vulicy pa piešachodnym pierachodzie pamiž im i ŭradžencam Biełarusi, jaki jechaŭ na skutary, adbyŭsia abmien słovami, a zatym transpartny srodak paskoryŭsia i pamčaŭsia na słužyciela carkvy.
Adnak na šlachu motarolera ŭstaŭ ahient supravadžeńnia, prystaŭleny da Kałučya z pryčyny pastajannych pahroz, i, niahledziačy na atrymanyja traŭmy, paśpieŭ dvojčy strelić u biełarusa, patrapiŭšy adnoj kulaj u pieradplečča.
Zatym adbyłasia bojka, padčas jakoj našaha suajčyńnika zatrymali. Jaho i paciarpiełaha achoŭnika adpravili ŭ balnicu. Tym časam u skutary pry ahladzie vyjavili šyroki nož dla raździełki miasa i małatok.
Mahčyma, što vypadak kvalifikavali jak zamach na zabojstva.
Advakaty kazali, što pra zamach na zabojstva nie moža być i havorki, i vinavacili va ŭsim źbieh abstavinaŭ. Pavodle ich viersii, pamiž razharačanym jazdoj biełarusam i Kałučya adbyłosia banalnaje nieparazumieńnie, chto kaho źbiraŭsia prapuścić.
Cikava, što paśla incydentu svaju salidarnaść i padtrymku śviataru i jaho antynarkatyčnaj dziejnaści vykazali mnohija aficyjnyja asoby Italii. U tym liku słužyciela carkvy pryniała premjer-ministr Džordža Miełoni.
Pra ŭradženca Biełarusi viadoma niašmat. ŚMI pisali, što mužčyna ŭžo mieŭ prablemy z zakonam praz narkotyki. Jość danyja, što jaho maci pa nacyjanalnaści — biełaruska (jaho ŭ italjanskich ŚMI nazyvali Sierdžya), što jon byccam by ŭžo niekalki hadoŭ nie žyvie z baćkami i nie byŭ pracaŭładkavany.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam17
Kamientary