Zialenski raskazaŭ pra płan pa zakančeńni vajny i čyrvonyja linii dla Ukrainy

Zialenski skazaŭ, što «kali ŭsio heta budzie zroblena, to paśla padrychtoŭki hetaha płana budzie paetapnaje jaho vykanańnie, jakoje pryviadzie da zakančeńnia vajny».

Tema harantyj biaśpieki dla Ukrainy na pieramovach, pavodle prezidenta Ukrainy, abmiarkoŭvałasia:

«Adnak bolš detalova pra harantyi biaśpieki my budziem havaryć, kali budzie vykanana cišynia na praciahu 30 dzion. Hałoŭnaje — uzhadnić z našymi sajuźnikami i zafiksavać u dakumientach kroki i farmaty tych ci inšych harantyj biaśpieki, jakija buduć va Ukrainy paśla zakančeńnia hetaj vajny».

Pry hetym asablivych iluzij ukraincy nie majuć:

«Nichto z nas nie vieryć rasijanam, my heta prachodzili, ale hulać z naratyvami pra toje, što my nie chočam zakančeńnia vajny, my nie budziem. Ja nastrojeny vielmi surjozna, dla mianie važna zaviaršyć vajnu. Ja chaču, kab prezident ZŠA heta bačyŭ, kab Jeŭropa, usie byli ŭ sajuzie, kab prymusić RF da zaviaršeńnia vajny».

Na pieramovach, pa słovach Zialenskaha, abmiarkoŭvali i pytańnie sankcyj da Rasii, kali jana nie pojdzie na pieramirje na prapanavanych umovach:

«Kali rasijanie prademanstrujuć, što jany hatovyja na prapanovu Amieryki, to ja dumaju, buduć adpaviednyja rašeńni, a kali jany nie hatovyja — my vielmi spadziajemsia, što amierykanski bok prademanstruje mienavita toje, pra što jon kazaŭ».

«Adnosna čyrvonych linij: ja jak prezident i ŭkraincy jak hramadzianie svajoj krainy nie buduć parušać Kanstytucyju. Ja budu abaraniać suvierenitet i našu niezaležnaść, abaraniajučy našych ludziej i našu ziamlu», — adznačyŭ Uładzimir Zialenski.

Jon dadaŭ, što jašče adna čyrvonaja linija padčas pieramoŭ dla Kijeva — niemahčymaść pryznańnia rasijskimi akupavanych Rasijaj terytoryj Ukrainy:

«My vajujem za našu niezaležnaść. Tamu pryznavać jakija-niebudź akupavanyja terytoryi Rasijaj my nie budziem. Našy ludzi zmahalisia za heta, našy hieroi zahinuli. Kolki paranienych, kolki ŭsiaho pieražyta. Tamu nichto nie zabudzie pra heta. Heta samaja hałoŭnaja čyrvonaja linija».

Taksama prezident Ukrainy zajaviŭ, što vybary va Ukrainie adbuducca paśla zakančeńnia vajny, heta značyć admieny vajennaha stanovišča. Raniej u administracyi prezidenta ZŠA Donalda Trampa vykazvalisia za praviadzieńnie vybaraŭ da zakančeńnia vajennaha stanovišča, choć heta supiarečyć Kanstytucyi Ukrainy. U finalnyja damoŭlenaści, jakich Kijeŭ i Vašynhton dasiahnuli ŭ Džydzie 11 sakavika, pytańnie praviadzieńnia vybaraŭ uklučanaje nie było.

• 19
• 1
• 3
• 1
• 0
• 1
• 0
• 0