Зяленскі расказаў пра план па заканчэнні вайны і чырвоныя лініі для Украіны
Прэзідэнт Украіны Уладзімір Зяленскі 12 сакавіка падчас размовы з журналістамі ў Кіеве заявіў, што «пакрокавы план з гарантыямі бяспекі для ўкраінскага боку» будзе складзены падчас 30-дзённага перамір'я, на якое Украіна пагадзілася падчас перамоў з ЗША ў Саудаўскай Аравіі напярэдадні.
Зяленскі сказаў, што «калі ўсё гэта будзе зроблена, то пасля падрыхтоўкі гэтага плана будзе паэтапнае яго выкананне, якое прывядзе да заканчэння вайны».
Тэма гарантый бяспекі для Украіны на перамовах, паводле прэзідэнта Украіны, абмяркоўвалася:
«Аднак больш дэталёва пра гарантыі бяспекі мы будзем гаварыць, калі будзе выканана цішыня на працягу 30 дзён. Галоўнае — узгадніць з нашымі саюзнікамі і зафіксаваць у дакументах крокі і фарматы тых ці іншых гарантый бяспекі, якія будуць ва Украіны пасля заканчэння гэтай вайны».
Пры гэтым асаблівых ілюзій украінцы не маюць:
«Ніхто з нас не верыць расіянам, мы гэта праходзілі, але гуляць з наратывамі пра тое, што мы не хочам заканчэння вайны, мы не будзем. Я настроены вельмі сур'ёзна, для мяне важна завяршыць вайну. Я хачу, каб прэзідэнт ЗША гэта бачыў, каб Еўропа, усе былі ў саюзе, каб прымусіць РФ да завяршэння вайны».
На перамовах, па словах Зяленскага, абмяркоўвалі і пытанне санкцый да Расіі, калі яна не пойдзе на перамір'е на прапанаваных умовах:
«Калі расіяне прадэманструюць, што яны гатовыя на прапанову Амерыкі, то я думаю, будуць адпаведныя рашэнні, а калі яны не гатовыя — мы вельмі спадзяемся, што амерыканскі бок прадэманструе менавіта тое, пра што ён казаў».
«Адносна чырвоных ліній: я як прэзідэнт і ўкраінцы як грамадзяне сваёй краіны не будуць парушаць Канстытуцыю. Я буду абараняць суверэнітэт і нашу незалежнасць, абараняючы нашых людзей і нашу зямлю», — адзначыў Уладзімір Зяленскі.
Ён дадаў, што яшчэ адна чырвоная лінія падчас перамоў для Кіева — немагчымасць прызнання расійскімі акупаваных Расіяй тэрыторый Украіны:
«Мы ваюем за нашу незалежнасць. Таму прызнаваць якія-небудзь акупаваныя тэрыторыі Расіяй мы не будзем. Нашы людзі змагаліся за гэта, нашы героі загінулі. Колькі параненых, колькі ўсяго перажыта. Таму ніхто не забудзе пра гэта. Гэта самая галоўная чырвоная лінія».
Таксама прэзідэнт Украіны заявіў, што выбары ва Украіне адбудуцца пасля заканчэння вайны, гэта значыць адмены ваеннага становішча. Раней у адміністрацыі прэзідэнта ЗША Дональда Трампа выказваліся за правядзенне выбараў да заканчэння ваеннага становішча, хоць гэта супярэчыць Канстытуцыі Украіны. У фінальныя дамоўленасці, якіх Кіеў і Вашынгтон дасягнулі ў Джыдзе 11 сакавіка, пытанне правядзення выбараў уключанае не было.
Расія ўдарыла па Крывым Розе, Адэсе і Харкаву
«Мяч на баку Расіі» азначае, што Масква цяпер можа адчуць ціск
У Зяленскага паведамілі, калі пачнуць абмеркаванне дэталяў пра спыненне агню
Макрон заклікаў распрацаваць план гарантый бяспекі для Украіны на выпадак спынення агню
Зяленскі: Мы пагаджаемся, і калі пагодзяцца расіяне — у той момант цішыня запрацуе
ЗША аднаўляюць вайсковую дапамогу Украіне. Расіі прапануецца спыненне агню на 30 дзён, Украіна на гэта згодна
Цяпер чытаюць
«Стаяць на сваім, кожны наколькі можа!» Вялікая гутарка з Наталляй Дулінай пра гопнікаў з ГУБАЗіКа, Калеснікаву і што там у каго ў калоніі10
Каментары