Makron zaklikaŭ raspracavać płan harantyj biaśpieki dla Ukrainy na vypadak spynieńnia ahniu
Prezident Francyi Emanuel Makron 11 sakavika zaklikaŭ vajskovaje kiraŭnictva Jeŭropy i NATA raspracavać płan «dla vyznačeńnia nadziejnych harantyj biaśpieki» dla Ukrainy ŭ vypadku spynieńnia ahniu i «z ulikam paskareńnia mirnych pieramovaŭ», paviedamlaje AFP sa spasyłkaj na aficyjnuju zajavu Jelisiejskaha pałaca.
Siońnia taksama paviedamlałasia, što Makron adkryŭ naradu načalnikaŭ štaboŭ kala 30 krain, jakija pavinny padrychtavać prajekt vajskovaha kantynhientu «kaalicyi achvotnych». Hety kantynhient zadumany jak sposab strymać Rasiju ad parušeńnia pieramirja va Ukrainie, kali takoje budzie dasiahnutaje. Viadučuju rolu ŭ hetym pačynańni hrajuć Vialikabrytanija i Francyja.
Brytanskija aficyjnyja asoby na minułym tydni kazali, što pra svoj patencyjny ŭdzieł u kaalicyi zajavili kala 20 krain, ale nie ŭsie ź ich hatovyja pasłać vojski. Poŭny śpis krain da hetaha času nie raskryvaŭsia, ale ličycca, što heta krainy Jeŭrasajuza albo Brytanskaj Sadružnaści.
Siońnia daradca prezidenta ZŠA Donalda Trampa pa nacyjanalnaj biaśpiecy Majk Uołc na bryfinhu paśla zakančeńnia pieramoŭ pamiž delehacyjami ZŠA i Ukrainy ŭ Džydzie (Saudaŭskaja Aravija) paviedamiŭ, što ZŠA buduć prasoŭvać prapanovu ab spynieńni ahniu va Ukrainie na mižnarodnym uzroŭni.
Pavodle jaho słoŭ, dziaržsakratar ZŠA Marka Rubia pavinien pradstavić hetuju prapanovu na samicie krain G7, a prezident ZŠA Donald Tramp pradstavić jaje hiensakrataru NATA Marku Rute ŭžo 13 sakavika.
«Prezident Tramp pačaŭ hetyja dypłamatyčnyja namahańni ŭ Avalnym kabiniecie, razmaŭlajučy z abodvuma lidarami — prezidentam Pucinym i prezidentam Zialenskim. Ciapier, kali čaŭnočnaja dypłamatyja praciahvajecca, u nas jość delehacyja pa nastupnych krokach z rasijskaha boku i ŭ nas jość delehacyja pa nastupnych krokach z ukrainskaha boku. Ja budu havaryć z rasijskim kalehami najbližejšymi dniami», — padkreśliŭ Uołc.
Daradca Trampa: Na pieramovach u Džydzie abmiarkoŭvalisia i doŭhaterminovyja harantyi dla Ukrainy
Zialenski: My pahadžajemsia, i kali pahodziacca rasijanie — u toj momant cišynia zapracuje
ZŠA adnaŭlajuć vajskovuju dapamohu Ukrainie. Rasii prapanujecca spynieńnie ahniu na 30 dzion, Ukraina na heta zhodna
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary