Syna eks-kiraŭnika Bresckaj vobłaści asudzili za ŭdzieł u pratestach
40-hadovy Pavieł Lis uznačalvaŭ Hałoŭny infarmacyjna-analityčny centr Ministerstva adukacyi, a paśla pierajšoŭ u śfieru IT. Jaho baćka ciapier — pasoł u Hruzii.
Sud Maskoŭskaha rajona Minska vynies prysud pa spravie 40-hadovaha Paŭła Lisa. Kamiercyjnamu dyrektaru kampanii ITTAS prysudzili chatniuju chimiju za ŭdzieł u pratestach 2020 hoda.
Jaho imia dadali ŭ śpis ekstremistaŭ.
Pavieł Lis — syn 67-hadovaha vysokapastaŭlenaha čynoŭnika Anatola Lisa.
Lis-starejšy z 2022 hoda pracuje pasłom Biełarusi ŭ Hruzii, a da taho zrabiŭ admietnuju karjeru — kiraŭnik Navahrudka (1996—2005), deputat Pałaty pradstaŭnikoŭ (2005—2007), kiraŭnik Mazyra (2007-2009), namieśnik ministra pryrody (2009—2013), pamočnik Łukašenki pa Homielščynie (2013—2014), namieśnik kiraŭnika Administracyi prezidenta (2014), kiraŭnik Bresckaj vobłaści (2014—2021).
Sam Pavieł Lis naradziŭsia ŭ 1984 hodzie. Skončyŭ matematyčny fakultet Hrodzienskaha dziaržaŭnaha ŭniviersiteta (śpiecyjalnaść «Ekanamičnaja kibiernietyka») u 2006-m i aśpiranturu na ekanamičnym fakultecie BDU ŭ 2016-m.
Pracavaŭ namieśnikam prarektara BDUIR (2012—2016), dyrektaram Hałoŭnaha infarmacyjna-analityčnaha centra Ministerstva adukacyi (2016—2019), paśla čaho pajšoŭ u IT.
Z 2024 hoda Pavieł Lis — kamiercyjny dyrektar kampanii ITTAS.
Masavyja palityčnyja represii ŭ Biełarusi praciahvajucca z 2020 hoda. Tady, miarkujučy pa pratakołach učastkovych vybarčych kamisij, Alaksandr Łukašenka prajhravaŭ Śviatłanie Cichanoŭskaj, ale nie addaŭ ułady.
Pa słovach namieśnika načalnika Hałoŭnaha ŭpraŭleńnia pracesualnaha kantrolu Śledčaha kamiteta Alaksandra Žukava, było zafiksavana bolš za 22 500 «złačynstvaŭ ekstremisckaj skiravanaści», heta značyć, palityčnaha charaktaru. Pa mnohich z hetych kryminalnych spravaŭ prachodziać šmatlikija fihuranty.
Zhodna ź infarmacyjaj Paŭła Łatuški, pradstaŭnika Abjadnanaha pierachodnaha kabinieta, z 2020 hoda represii zakranuli 136 tysiač čałaviek. Niekalki socień tysiač biełarusaŭ vymušanyja byli pakinuć krainu.
«Naša Niva» — bastyjon biełaruščyny
PADTRYMAĆCiapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich1919
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich19
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1818
Kamientary