U Hiermanii masava zakryvajucca pivavarni, bo moładź bolš nie cikavić ałkahol
Apošniaj achviaraj novaha trendu stała pivavarnia Lang-Bräu, jakaja pracavała na praciahu 172 hadoŭ, ale praz zumieraŭ vymušana zakrycca. Pavodle słoŭ ekśpiertaŭ, heta zusim nie časovy spad, a kulturny pierałom, jaki stavić pad pahrozu isnavańnie ŭsioj haliny.
Lang-Bräu — nievialikaja bavarskaja pivavarnia z horada Šenbrun — pracavała z 1853 hoda. Jaje historyja ŭklučała suśvietnyja vojny, padzieńnie Bierlinskaj ściany i dziesiacihodździ pieramien. Ale navat hety ŭstojlivy biźnies nie zdoleŭ spravicca z sučasnym vyklikam: dla dalejšaj pracy patrabavałasia madernizacyja na sumu 12 miljonaŭ jeŭra. Uładalniki vyrašyli zakrycca, piša vydańnie Smartpress.by
«Kali prodažy padajuć, a vydatki praciahvajuć raści, zastajecca mała mahčymaściaŭ dla doŭhaterminovych płanaŭ», — raspavioŭ Ryčard Chopf, były kiraŭnik i spadkajemca siamiejnaj spravy, jaki ciapier zaviaršaje praces likvidacyi biźniesu.
Niepituščyja zumiery
Finansavy cisk na pivavarni raście: inflacyja, vysokija vydatki na enierhiju, padzieńnie popytu. Ale bolš za ŭsio vytvorcaŭ niepakoić novy spažyviec — zumiery, abo pakaleńnie Z.
Zumiery — heta ludzi, narodžanyja prykładna z 1997 pa 2012 hod. Heta pieršaje pakaleńnie, jakoje vyrasła ŭ całkam ličbavym śviecie — z dostupam da internetu, smartfonaŭ, sacsietak i hłabalnaj infarmacyi ź dziacinstva.
Jak vyjaviłasia, dla pakaleńnia zumieraŭ piva — nie norma, a chutčej redkaje vyklučeńnie. I navat u takich vypadkach moładź usio čaściej vybiraje biezałkaholnyja varyjanty. U vyniku vytvorčaść piva ŭ Hiermanii ŭpała na 6,3% tolki za pieršuju pałovu 2025 hoda — heta novy minimum.
Pavodle infarmacyi ahienctva Bloomberg, u siarednim adzin niemiec vypivaje 88 litraŭ piva ŭ hod. Dla paraŭnańnia: u 2000 hodzie hety pakazčyk składaŭ 126 litraŭ. Rehularnaje spažyvańnie ałkaholu siarod moładzi va ŭzroście 18—25 hadoŭ padaje z hoda ŭ hod.
Čamu moładź raźlubiła ałkahol
Karła Šyśler, studentka z paŭdniova-zachodniaj Hiermanii, kaža prosta: «Ja b nikoli jaho nie zamoviła».
Jaje pakaleńnie pierakanana: ałkahol škodny. Kałoryi, upłyŭ na fizičnuju formu, parady fitnies-błohieraŭ — usio heta pracuje suprać tradycyjnaha piva.
«Ciažka palapšać formu, kali ty pješ», — pryznajecca Luk Chajler, 22-hadovy chimik, jaki aktyŭna zajmajecca sportam.
Biezałkaholny bum
Tendencyja viadzie da taho, što popyt źmiaščajecca ŭ bok piva z utrymańniem ałkaholu mienš za 0,5%. Chacia vytvorčaść biezałkaholnych napojaŭ u Hiermanii amal padvoiłasia za dziesiacihodździe, asvoić hetuju nišu mohuć daloka nie ŭsie.
Praces vydaleńnia ałkaholu paśla zakisańnia patrabuje składanaha abstalavańnia — kala 1 miljona jeŭra inviestycyj.
«Nievialikija pivavarni nie mohuć sabie hetaha dazvolić», — patłumačyŭ Tomas Biekier, prafiesar ź Miunchiena.
Zamiest hetaha jany vykarystoŭvajuć sproščanuju technałohiju: spyniajuć zakisańnie daterminova. Vynik — saładkavaty smak, jaki lohka adroźnić ad aryhinała. Kankurencyja z bujnymi brendami stanovicca niemahčymaj.
Najbujniejšaje zakryćcio pivavarniaŭ za 30 hadoŭ
Z 2023 pa 2024 hod u Hiermanii zakrylisia 52 pivavarni — heta maksimum za try dziesiacihodździ. Nie ŭsie zdolnyja prystasavacca: adny pašyrajuć asartymient za košt radleraŭ i piva z sokami, inšyja zapuskajuć rekłamnyja kampanii pad słohanam «zabavy biez ałkaholu».
Ale navat u krainie, dzie dziejničaje 500-hadovy zakon pra čyściniu piva, novaja realnaść užo pierastała zdavacca časovaj.
Ciapier čytajuć
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu1313
Kamientary