Narviežskaja afiera Kramla: jak cieniavy fłot Rasii atrymlivaŭ falšyvyja strachoŭki

U samym sercy Osła, u prestyžnym budynku Narviežskaj asacyjacyi sudnaŭładalnikaŭ, była zarehistravanaja kampanija Ro Marine. Adnak, jak vyjaviłasia, nivodnaha supracoŭnika firmy tam nikoli nie było. Kampanija isnavała tolki na papiery i dystancyjna pradavała falšyvyja strachavyja polisy dla dziasiatkaŭ sudnaŭ, jakija pieravozili rasijskuju naftu, haz i vajennyja hruzy.

Heta aznačaje, što nivodny sa strachavych polisaŭ Ro Marine nie dziejničaŭ, tamu ŭ vypadku avaryi na tankiery jeŭrapiejskija ŭłady nie zmahli b atrymać kampiensacyju za likvidacyju nastupstvaŭ ekałahičnaj katastrofy.

Detali hetaj afiory stali viadomyja dziakujučy supolnamu rasśledavańniu narviežskaha miedyjakancerna NRK i rasijskaha Centra «Dośje». Pavodle danych žurnalistaŭ, za hetaj schiemaj stajali dvoje hramadzian Narviehii, bałharyn i rasijanin Andrej Mačalin z Sankt-Pieciarburha, jaki ličyŭsia ŭładalnikam Ro Marine.

Pavialičyć

Narviežski finansavy rehulatar Finanstilsynet paćvierdziŭ, što kampanija fizična nie viała dziejnaści ŭ krainie, i ŭ sakaviku 2025 hoda zapatrabavaŭ nieadkładna spynić jaje pracu, pieradaŭšy spravu ŭ palicyju.

Nafta, haz i zbroja pad falšyvym polisam

Dakumienty, jakija trapili ŭ ruki rasśledavalnikaŭ, śviedčać, što heta była nie pryvatnaja inicyjatyva. Płaciažy za fiktyŭnyja polisy prachodzili praz rasijskuju firmu Mačalina «Chajdor Sankt-Pieciarburh».

Siarod klijentaŭ ašukancaŭ byli takija hihanty, jak «Navatek» i «Rasnafta», a taksama firmy, jakija dastaŭlali iranskuju zbroju ŭ Rasiju, bojeprypasy ŭ Ałžyr, i navat arhanizacyja, źviazanaja z HRU. Heta dazvalaje zrabić vysnovu, što afiora była b niemahčymaj bieź viedama i ŭchvaleńnia Kramla.

Pavialičyć

Kab schiema pracavała maštabna, ašukancam treba było atrymać aficyjnaje pryznańnie ad krain, pad čyimi ściahami chodziać sudny «cieniavoha fłotu». Adnoj z klučavych metaŭ stała Panama, bo jana maje najbujniejšy ŭ śviecie sudnavy rejestr. Kab atrymać dazvoł ad panamskich uładaŭ, RoMarine pajšła na padrobku — pradstaviła čynoŭnikam sfalsifikavany dakumient, nibyta vydadzieny ŭ Śjera-Leone.

Usiaho Ro Marine paśpieła vydać padroblenyja polisy dla jak minimum 256 sudnaŭ, u tym liku dla 76 tankieraŭ z rasijskaha «cieniavoha fłotu». Hetyja karabli, farmalna zastrachavanyja pa narviežskim adrasie, nasamreč vychodzili ŭ mora biez realnaha strachavoha pakryćcia, što źjaŭlajecca hrubym parušeńniem mižnarodnaha prava.

Jaskravym prykładam dziejnaści ašukancaŭ stała historyja dvuch sudnaŭ, Nan Feng Zhi Xing i Hunter Star. Uvosień 2024 hoda jany pieravozili z Kitaja abstalavańnie dla fłahmanskaha prajekta Kramla — zavoda pa zdabyčy zvadkavanaha hazu «Arktyk SPH 2», jaki naležyć kampanii «Navatek».

Pavialičyć

Kab prajści praź jeŭrapiejskija vody na zvarotnym šlachu, im była nieabchodnaja strachoŭka. Polisy byli aformlenyja praz Ro Marine, a hrošy za ich pieraličany na rachunak «Chajdor Sankt-Pieciarburh».

Pasłuhami Ro Marine karystalisia i partniory «Rasnafty». Tak najbujniejšym płacielščykam za falšyvyja polisy była dubajskaja firma Adele Shipping, źviazanaja z «cieniavym fłotam». Inšy bujny klijent — źviazanaja sa strukturami, blizkimi da kiraŭnika «Rasnafty» Ihara Siečyna hankonhskaja kampanija Bellatrix Energy, jakaja rezka naraściła ekspart rasijskaj nafty paśla ŭviadzieńnia ŭ pačatku 2023 hoda na jaje stoli cen.

Navat paśla taho, jak afiora była vykrytaja ŭ ŚMI, a narviežski rehulatar zapatrabavaŭ spynić dziejnaść Ro Marine, jak śćviardžajuć žurnalisty, schiema praciahvała pracavać. Karabli z padroblenaj strachoŭkaj možna było sustreć u jeŭrapiejskich partach.

Tak, zastrachavanaje ŭ Ro Marine sudna Astra, jakoje zajmajecca pracami pa pahłybleńni marskoha dna ź siaredziny lutaha pa mienšaj miery pa kaniec žniŭnia 2025 hoda znachodziłasia ŭ porcie Ryhi na ramoncie. Karabiel — častka fłotu «Biuro marskich prajektaŭ i technałohij», jakoje zajmajecca pracami ŭ porcie Uść-Łuha pa zamovie hrupy «Navatrans».

Jak raspavioŭ žurnalistam adzin z klijentaŭ Ro Marine, «usie viedali», što kampanija fiktyŭnaja. Ale sapraŭdnaja strachoŭka nikomu i nie była patrebnaja. Hałoŭnaj metaj było atrymać dakumient, jaki dazvalaŭ by abychodzić sankcyi i prachodzić pravierki ŭ jeŭrapiejskich partach. I hetuju pasłuhu ašukancy akazvali ŭ poŭnaj miery.

• 1
• 1
• 2
• 8
• 1
• 0
• 9
• 0