«Lublu, kali biełarusy biełarusiacca»: u sacsietkach žartujuć z nadvorja i abmiarkoŭvajuć prablemy
Baćki spračajucca, ci narmalna heta — prymušać školnikaŭ čyścić ad śniehu terytoryju vakoł škoły, a śpiavak Alaksiej Chlastoŭ, jaki ciapier pracuje taksistam, niahledziačy na zaviruchu, vyjšaŭ na maršrut. Sabrali reakcyju biełarusaŭ na cykłon Uli.
U Threads virusnym staŭ dopis Vieraniki sa stalicy. Jana apublikavała videa, jak mužčyna kala vakzała sprytna machaje šuflem:
«Hieroi nie ŭ kino, a pobač! Małady chłopiec, jaki zabraŭ šufiel u žančyny-dvornika i pačaŭ rasčyščać śnieh u samym centry Minska — viedaj, ty moj hieroj. Heta tak pa-mužčynsku».
Za 7 hadzin dopis sabraŭ 17 tysiač padabajek. Ludzi ŭ zachapleńni: «Lublu, kali biełarusy biełarusiacca», «U achapak i ŭ ZAHS! Takija na darozie nie valajucca». A SMMščyk pivavarni-restarana «Siabry» prapanavaŭ hieroju videa zajści da ich i paabiacaŭ pačastavać taho abiedam.
Papularnym stała i videa, u jakim nievialiki sabaka, jakoha praktyčna nie vidać u śniezie, sprabuje iści za haspadarom. «Usie biełarusy siońnia jak hety džek-raseł-terjer», — padpisała svoj rolik dziaŭčyna.
Šmat aktyŭnych dyskusij uźnikła nakont taho, ci varta było siońnia adpraŭlać dziaciej u škoły. Mierkavańni padzialilisia: pakul adny pišuć arhumienty ź sieryi «My ŭ luboje nadvorje chadzili ŭ škołu — i ničoha», inšyja ličać, što takija podźvihi niepatrebnyja.
Naprykład, virusicca videa, u jakim školnik ledź-ledź ciahniecca praź vialikija sumioty. «Nu ciapier i hetaje pakaleńnie, kali vyraście, budzie raskazvać dzieciam jak pa sumiotach pa pojas dabiralisia da škoły», — žartujuć kamientatary.
Niekatoryja baćki ździŭlalisia paviedamleńniam ad škoł. Adzin z tataŭ padzialiŭsia skrynšotam:
«Zaŭtra chłopčyki prychodziać u himnaziju a 8.00. Budziem prybirać śnieh. Prakantralujcie, kali łaska, kab dzieci zahadzia vyjšli z domu, kab pryjści svoječasova».
Sutnaść hetaj dyskusii lepš za ŭsio pieradajuć dva najbolš upadabanyja kamientary: «I što drennaha ŭ tym, što dziaciej buduć pryvučać da pracy? Vidavočna ž, što nie praśpiekt Niezaležnaści ich honiać čyścić. Pasilnyja zaniatki na śviežym pavietry. Navat viasiołyja. Ci vy nie byli dziećmi?» suprać «Majo dzicia — nie rabočaja siła. Kamunalnyja pytańni pavinny vyrašać ludzi, jakija za heta atrymlivajuć hrošy. U škołu dzicia chodzić atrymlivać adukacyju. Heta nie «zaniatki na śviežym pavietry», heta ekstremalnyja pahodnyja ŭmovy».
Jašče adna mama ź Minska padzialiłasia: «Čyrvony ŭzrovień niebiaśpieki. Naša kłasnaja piša, što 9 studzienia našym piacikłaśnikam treba naviedać muziej Vialikaj Ajčynnaj vajny».
U kamientarach da hetaha dopisu inšaja žančyna raskazała: «A ŭ nas u sadku vychavacielek kiraŭnictva źvierchu prymusiła vyvieści dziaciej na dvor u takuju zaviruchu i zrabić fatahrafii, jak im viesieła hulać u śniezie! Jak jany, blin, volny čas na vulicy baviać!».
Nie abyšłosia i biez kanfliktaŭ. Pobač sa staličnaj škołaj № 68 znachodzicca pryvatny siektar. Žychary damoŭ vyrašyli pačyścić darohu pobač sa svaimi damami — bo byŭ mocny śniehapad plus prajechaŭ traktar, jaki zakapaŭ mašyny.
Ale dyrektarcy škoły heta nie spadabałasia. Sprečka była praz toje, kudy treba zhrabać śnieh. U subcitrach tłumačycca, nibyta dyrektarka patrabavała, kab ludzi hrabli śnieh u svaje dvary, a nie na zialonuju zonu škoły.
Šmat biełarusaŭ u Threads chvalujecca za los badziažnych žyvioł. Niechta zaklikaje kožnuju hadzinu vychodzić na dvor i hladzieć, ci nie treba niejkaha kocika zapuścić u padjezd. Inšyja prapanoŭvajuć nieabyjakavym ludziam brać da siabie ŭ kvateru žyvioł z vulicy — chacia b na niejki čas.
Samyja vynachodlivyja biełarusy ŭžo znajšli varyjant padzarabić: minčanka prademanstravała vizitoŭki, dzie nieznajomiec prapanoŭvaje pačyścić śnieh za 5 chvilin. Jość prypiska: «znachodžusia na parkoŭcy».
Inšaja biełaruska aburajecca cenami taksi. Dva kiłamietry «Jandeks» joj prapanoŭvaŭ prajechać koštam ad 10,3 da 11,4 rubli.
Darečy, praciahvajučy temu taksi: śpiavak-taksist Alaksiej Chlastoŭ pakazaŭ, jak adkopvaje svaju mašynu. «Ja ŭ šapcy, usio dobra, nie chvalujciesia!» — supakoiŭ jon padpisčykaŭ. A paśla raspavioŭ, što paŭtara kiłamietra jedzie ažno 20 chvilin.
U tyktoku ž zachaplajucca biełarusami, jakija ŭ dzień, kali abvieščany čyrvony ŭzrovień niebiaśpieki, vyrašyli vybić dyvany na śniezie. Ich nie spyniła navat toje, što šalony viecier źnios adzin z dyvanoŭ!
Ludzi žartujuć: «A što rabić? Tradycyi — heta śviatoje», Treba paśpieć, pakul lažyć śnieh — heta ŭ nas redkaja źjava zaraz», «Nam śnieh tolki dla hetaha i patrebny!».
A biełaruska Aksana vykłała videa, jak rasčyščaje śnieh, i padpisała: «Adčuvaju, što hod biełaruskaj žančyny niejak źviazany z hodam kania, ale nijak nie mahu zrazumieć jak».
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary