«Čas zakančvajecca». Tramp pahražaje Iranu novymi ŭdarami

Tramp nie pieršy raz pahražaje Iranu, i jak pišuć ŚMI, ciapier vyvučaje roznyja varyjanty ŭdaraŭ pa Iranie, choć i nie pryniaŭ kančatkovaje rašeńnie.

«Spadziajusia, Iran chutka «siadzie za stoł» i damovicca ab spraviadlivaj i raŭnapraŭnaj ździełcy — NIJAKAJ JADZIERNAJ ZBROI — jakaja budzie dobraja dla ŭsich bakoŭ. Čas minaje», — napisaŭ Tramp u svajoj sacsietcy Truth Social.

U 2018 hodzie padčas svajho pieršaha prezidenckaha terminu Tramp abviaściŭ pra vychad z pahadnieńnia ab jadziernaj prahramie Irana i ŭvioŭ suprać krainy sankcyi.

Tramp dadaŭ u sieradu, što da Irana nabližajecca «vielizarnaja armada»: «Heta bolšy fłot, uznačaleny vialikim avijanoscam «Aŭraam Linkaln», čym toj, jaki byŭ adpraŭleny ŭ Vieniesuełu».

U rajon Piersidskaha zaliva, da bierahoŭ Irana, sapraŭdy prybyła amierykanskaja avijanosnaja hrupa. Pakul nieviadoma, ci ažyćciaviacca pahrozy Trampa, ale patrebnyja siły dla ŭdaru, jak miarkujuć vajennyja ahladalniki, sabranyja.

ZŠA ŭ červieni minułaha hoda padčas 12‑dzionnaj vajny Irana ź Izrailem nanieśli ŭdary pa jadziernych abjektach Irana. Tramp tady zajaŭlaŭ, što iranskaja jadziernaja prahrama źniščana.

Iran u studzieni skałynuli maštabnyja antyŭradavyja pratesty. Tramp pahražaŭ prymianić vajennuju siłu ŭ adkaz na žorstkaje padaŭleńnie antyŭradavych pratestaŭ u krainie, ale potym pieradumaŭ. Ciapier jon nie zhadaŭ ab pratestach, choć try tydni tamu zaklikaŭ udzielnikaŭ masavych vystupaŭ praciahvać zmahacca i zapeŭniŭ, što «dapamoha ŭžo ŭ darozie».

Pavodle jaho słoŭ, novy ŭdar pa Iranie ŭ vypadku admovy ad ździełki budzie «našmat horšy», čym toj, što ZŠA nanieśli pa jadziernych abjektach Irana minułym letam, padčas 12‑dzionnaj izrailska-iranskaj vajny.

Jak pišuć ŚMI, Tramp vyvučaje novyja varyjanty naniasieńnia ŭdaraŭ pa Iranie.

Pa infarmacyi CNN i Reuters, siarod razhladanych opcyj — udary pa kiraŭnictvie isłamskaj respubliki i supracoŭnikach sił biaśpieki, jak miarkujecca, adkaznych za zabojstvy pratestoŭcaŭ, a taksama ŭdary pa jadziernych abjektach i ŭradavych ustanovach.

Jak pišuć ŚMI sa spasyłkaj na krynicy, Tramp ličyć, što ŭ jaho ciapier bolš mahčymaściej udaryć pa Iranie, čym raniej, dziakujučy prybyćciu ŭ blizkaŭschodni rehijon avijanosnaj ŭdarnaj hrupy.

Na amierykanski ŭdar Iran paabiacaŭ adkazać. Pa słovach daradcy viarchoŭnaha lidara Irana Ali Šamchani, adkaz budzie nakiravany jak suprać ZŠA i Izraila, tak i suprać usich, chto padtrymaje ahresiju.

• 1
• 0
• 0
• 1
• 0
• 0
• 0
• 0