Da ranicy sierady ŭ Litvu ź Biełarusi viarnulisia 33 hruzaviki
Praz pahraničnyja punkty Miedniki i Salečniki ŭ Litvu ź Biełarusi da 7 hadziny ranicy sierady viarnulisia 33 hruzaviki, jakija raniej byli zatrymanyja ŭ Biełarusi, paviedamiŭ pradstaŭnik Słužby achovy dziaržaŭnaj miažy Litvy (VSAT) Hiedrus Mišucis, paviedamlaje LRT.
Pavodle jaho słoŭ, praz punkt propusku Miedniki viarnulisia 16 hruzavikoŭ, praz Salečniki — 17.
Pradstaŭnik VSAT padkreśliŭ, što pravierka hetych hruzavikoŭ na litoŭskim baku ŭ abodvuch punktach ažyćciaŭlajecca pa asobnych pałosach.
«Na litoŭskim baku ŭ abodvuch punktach abstalavanyja asobnyja pałosy, asobnyja kalidory dla hruzavikoŭ, jakija ŭjazdžajuć. Ich pravierka pravodzicca vielmi apieratyŭna. Heta časovaja miera, pryniataja z ulikam taho, što ich pačali vypuskać i jany viartajucca ź Biełarusi», — adznačyŭ H. Mišucis. Jon taksama źviarnuŭ uvahu, što praktyčna ŭsie zatrymanyja ŭ Biełarusi hruzaviki, jakija viartajucca ŭ Litvu, kirujucca hramadzianami Biełarusi, jakija majuć dazvoł na žycharstva ŭ Litvie.
«Praktyčna ŭsie vadzicieli hetych hruzavych aŭtamabilaŭ ź litoŭskimi numarami — hramadzianie Biełarusi ź vidam na žycharstva ŭ Litvie. (…) Byŭ adzin hramadzianin Polščy i, mahčyma, jašče adzin-dva vadzicieli nie ź Biełarusi», — skazaŭ pradstaŭnik VSAT.
Pavodle słoŭ H. Mišucisa, hruzaviki, jakija viartajucca ź Minska, składajuć prykładna adnu šostuju ŭsich hruzavych aŭtamabilaŭ, što ŭjazdžajuć praz hetyja punkty propusku.
«Kali pahladzieć na ahulnuju kolkaść hruzavikoŭ, što ŭjechali za apošnija sutki, to praź Miedniki ŭjechała 103, praz Salečniki — 87, usiaho — 190. (…) Hruzaviki ź litoŭskimi numarami, zatrymanyja ŭ Minsku, składajuć prykładna adnu šostuju ad ahulnaha patoku», — adznačyŭ jon.
Ciapier čytajuć
Kačanava prapanavała ŭvieści adkaznaść za «niapraŭdu ŭ tyktoku»11
Kamientary