«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy

20 krasavika dziaržaŭnyja ŚMI Biełarusi apublikavali dziasiatki frahmientaŭ intervju Alaksandra Łukašenki rasijskamu prapahandysckamu kanału. U jakaści asnoŭnaha pasłańnia sotni dziaržaŭnych ŚMI i kanałaŭ akcentujuć krytyku palityčnych sistem, zasnavanych na svabodnych vybarach.

Alaksandr Łukašenka zajaviŭ, što «ŭ časy Savieckaha Sajuza zyčliŭcy z Zachadu padbuchtorvali da baraćby z kiraŭničaj i nakiroŭvajučaj rolaj Kamunistyčnaj partyi, jakaja była zamacavana ŭ Kanstytucyi. «A, jak siońnia vyjaviłasia, usio heta było brachnioj, zachodniaj brachnioj», — zajaviŭ dyktatar.

Pavialičyć

Pavialičyć

«Zachodniki nam rekamiendavali pierš za ŭsio šmatpartyjnaść, pluralizm mierkavańniaŭ dy inšaje, inšaje, inšaje. Jany nam rekamiendavali, a my hetaha trymalisia. U avanhardzie išła, viadoma, Rasija na čale ź Jelcynym, — skazaŭ Alaksandr Łukašenka. — Da čaho heta pryviało, vy heta viedajecie. Asabliva na prykładzie Rasii».

Łukašenka paŭtaryŭ svajo łžyvaje śćviardžeńnie, što, budučy deputatam, hałasavaŭ suprać raspadu Savieckaha Sajuza. (Nasamreč, adzinym deputatam Viarchoŭnaha Savieta 12‑ha sklikańnia, jaki hałasavaŭ suprać, byŭ Valeryj Cichinia, zachavalisia adpaviednyja archiŭnyja dakumienty. Sam Łukašenka ad hałasavańnia ŭchiliŭsia.)

Zajavy Alaksandra Łukašenki mohuć śviedčyć pra namier admianić navat farmalnaje abrańnie kiraŭnictva krainy na ŭsieahulnych vybarach i viarnucca da sistemy, jakaja isnavała ŭ SSSR dy ŭ toj ci inšaj formie zachavałasia ŭ Kitai, KNDR, na Kubie.

U joj farmalna kiraŭnika dziaržavy abiraje vuzkaje koła elity, aformlenaje ŭ kirujučuju partyju — u Biełarusi heta moža być sfarmavany pa śpisach, spuščanych źvierchu, Usiebiełaruski narodny schod, jaki hałasuje adnahałosna. A faktyčna maje miesca ničym nie abmiežavanaja ŭłada adnaho čałavieka, siamji ci hrupy ludziej.

Intervjujer z Russia Today padyhryvaŭ Alaksandru Łukašenku, zajaŭlaŭ, što toj karystajecca masavaj padtrymkaj ludziej. 

Padčas intervju ŭ 71‑hadovaha dyktatara mocna tresłasia hałava. Hety tremar upieršyniu staŭ zaŭvažny ŭ jaho dva z pałovaj hady nazad, ciapier jon uzmacniajecca.

Apošni raz Alaksandr Łukašenka dazvoliŭ rehistracyju niepadkantrolnaha sabie kandydata ŭ 2020 hodzie, kali CVK dapuściŭ da vybaraŭ Śviatłanu Cichanoŭskuju. Miarkujučy z pratakołaŭ z tych učastkaŭ, jak haradskich, tak i sielskich, dzie padlik hałasoŭ ažyćciaŭlaŭsia prazrysta, Łukašenka razhromna prajhravaŭ.

Ale nie addaŭ uładu, a prymusiŭ Cichanoŭskuju vyjechać za miažu. Heta vyklikała masavyja narodnyja pratesty, u jakich udzielničali miljony ludziej. U adkaz na heta ŭłady pačali palityčnyja represii. Sotni tysiač biełarusaŭ byli vymušanyja pakinuć krainu, jašče sotni tysiač patrapili ŭ roznaha typu «čornyja śpisy» na zvalnieńnie ci abmiežavańnie pravoŭ. Kala 150 tysiač stali achviarami kryminalnaha i administracyjnaha pieraśledu.

• 1
• 0
• 12
• 9
• 0
• 0
• 28
• 0