Upryhažeńni biełaruskaj dyzajnierki trapili na vystavu sučasnaha juvielirnaha mastactva ŭ Miłanie
Darja Łuckievič — stvaralnica brenda Label D — adzinaja biełaruska, čyje pracy trapili na prestyžnuju mižnarodnuju vystavu. Jana pracuje ź biełaruskim moranym dubam, jakomu niekalki tysiač hadoŭ. Zdabyvajuć taki materyjał u Dniapry.
Mastačka padzialiłasia ŭ Threads fotazdymkami ź miesca padziej: «Heta ja ŭ Miłanie na adkryćci vystavy sučasnaha juvielirnaha mastactva, adzinaja ź Biełarusi. Nu skažycie, što vy mnoj hanaryciesia, biełarusiki?!».
Da hetaha pracy Darji vystaŭlalisia ŭ Madrydzie na jubilejnaj dziasiataj vystavie sučasnaha mastactva.
Darja stvaryła brend Label D u 2012 hodzie. U adnym ź intervju dyzajnierka raspaviadała, što hłabalna źmianiła śfieru dziejnaści vypadkova. Pa adukacyi jana — nastaŭnica anhlijskaj i italjanskaj moŭ.
Baćka Darji — inžynier, ale ŭsio žyćcio ŭ volny čas rabiŭ niešta z drevam. Kali dziaŭčyna vučyłasia na pieršym kursie Linhvistyčnaha ŭniviersiteta, toj nabyŭ sabie takarny stanok.
Darja adrazu paprasiła zrabić jaho branzalet, potym jašče niekalki, razmalavała ich, pradała… Ale ž jana bačyła, što baćku niecikava rabić upryhažeńni, tamu pačała vučycca sama — kab nie marnavać jaho čas.
Spačatku ŭ chod išli višnia, lipa — karaciej, toje, što było pad rukoj. Z moranym dubam Darja paznajomiłasia paźniej. I litaralna adrazu ŭlubiłasia ŭ hety materyjał — čorny koler padavaŭsia vielmi stylovym. Samamu staromu moranamu dubu, jaki trapiŭ u ruki dyzajnierki, było 5 tysiač hadoŭ. A dastali jaho z dna Dniapra.
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary