Dyzajnierka stvaraje šykoŭnyja interjery ź biełaruskim kałarytam FOTY
Architektarka i dyzajnierka Hanna Kaśpiarovič pakazvaje ŭ sacsietkach, jakimi stylovymi mohuć być interjery ź biełaruskaj estetykaj u sučasnym pračytańni.
«Sučasny biełaruski interjer niasie ŭ sabie etnakod. Ale jon nie kryčyć, nia bje ŭ vočy, jon cichieńka prachodzić čyrvonaj nitačkaj praz usiu prastoru», — tłumačyć u błohu Hanna. U jaje mahistarskaja stupień u architektury — i haračaja luboŭ da biełaruskaj kultury i jaje vizualnych kodaŭ.
Nie tak daŭno da jaje źviarnulisia klijenty, jakija majuć va ŭłasnaści słucki pojas — ad takoha kaštoŭnaha ekspanata i adšturchoŭvałasia dyzajnierka ŭ stvareńni novaha interjernaha prajekta.
Jak bačna na rendarach, pojas musić zaniać hanarovaje miesca na ścianie la leśvicy.
«Sučasny biełaruski interjer — heta miesca, dzie zamiest žyrandoli pry ŭvachodzie visić sałamiany pavuk, jaki vykonvaje svaju funkcyju — adpužvaje złych duchaŭ na parozie! Dzie ŭ vyšyŭcy pieraplatajucca ŭzory rodnych krajoŭ. Dzie prysutničajuć tvory biełaruskich mastakoŭ i tvorcaŭ», — tłumačyć kancepcyju prajekta Hanna.
I sapraŭdy jana zmahła vielmi harmanična i niepapsova ŭpisać u interjer i arnamientalnuju vyšyŭku, i pavuka, i draŭlanyja elemienty ŭ pryrodnych, bahatych adcieńniach i aryhinalnych formach.
Sama pryroda ŭ Biełarusi i jaje łandšaft, faktury — najlepšyja natchnialniki ŭ spravie dyzajnu, ličyć Hanna.
Jašče ŭ adnym prajekcie — vannym pakoi, spałučanym z saunaj — Hanna dadała na ścianu zdymak biełaruskaj fatohrafki Kasi Pałasatki, i pakoj adrazu nabyŭ dadatkovuju biełaruskuju razynačku.
Akramia prafiesijnaj staronki na Behance, architektarka aktyŭna viadzie svoj błoh u instahramie, dzie dzielicca karysnymi paradami dla tych, chto ŭžo robić ci tolki źbirajecca zaniacca ramontam.
A haspadaram, jakija marać pra funkcyjanalny dyzajn vannaha pakoja, Hanna raić admovicca ad ciomnaj plitki, na jakoj zaŭsiody buduć bačnyja plamy. A taksama nie ŭstaloŭvać vannuju, jakaja budzie stajać asobna, kali da jaje nielha budzie padyści z usich bakoŭ, i nakładnyja rukamyjniki, kali vy nie vielmi lubicie doŭha prybiracca i baiciesia za budučy stan stalnicy tumby.
Ciapier čytajuć
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary