Упрыгажэнні беларускай дызайнеркі трапілі на выставу сучаснага ювелірнага мастацтва ў Мілане
Дар’я Луцкевіч — стваральніца брэнда Label D — адзіная беларуска, чые працы трапілі на прэстыжную міжнародную выставу. Яна працуе з беларускім мораным дубам, якому некалькі тысяч гадоў. Здабываюць такі матэрыял у Дняпры.
Мастачка падзялілася ў Threads фотаздымкамі з месца падзей: «Гэта я ў Мілане на адкрыцці выставы сучаснага ювелірнага мастацтва, адзіная з Беларусі. Ну скажыце, што вы мной ганарыцеся, беларусікі?!».
Да гэтага працы Дар'і выстаўляліся ў Мадрыдзе на юбілейнай дзясятай выставе сучаснага мастацтва.
Дар’я стварыла брэнд Label D у 2012 годзе. У адным з інтэрв’ю дызайнерка распавядала, што глабальна змяніла сферу дзейнасці выпадкова. Па адукацыі яна — настаўніца англійскай і італьянскай моў.
Бацька Дар’і — інжынер, але ўсё жыццё ў вольны час рабіў нешта з дрэвам. Калі дзяўчына вучылася на першым курсе Лінгвістычнага ўніверсітэта, той набыў сабе такарны станок.
Дар’я адразу папрасіла зрабіць яго бранзалет, потым яшчэ некалькі, размалявала іх, прадала… Але ж яна бачыла, што бацьку нецікава рабіць упрыгажэнні, таму пачала вучыцца сама — каб не марнаваць яго час.
Спачатку ў ход ішлі вішня, ліпа — карацей, тое, што было пад рукой. З мораным дубам Дар’я пазнаёмілася пазней. І літаральна адразу ўлюбілася ў гэты матэрыял — чорны колер падаваўся вельмі стылёвым. Самаму старому моранаму дубу, які трапіў у рукі дызайнеркі, было 5 тысяч гадоў. А дасталі яго з дна Дняпра.
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?1
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе99
Каментары