Maładuju ajcišnicu z Innowise Group asudzili za palityku

Hamialčancy Viktoryi Pataškinaj 33 hady. Jana skončyła Homielski dziaržaŭny ŭniviersitet imia Francyska Skaryny, dzie z 2009 pa 2013 hod vyvučała finansy i kredyt (bankaŭskuju spravu).

Paźniej dziaŭčyna źmianiła śfieru dziejnaści i pierajšła ŭ IT, dzie pačała pracavać inžynieram-prahramistam i śpiecyjalistam pa aŭtamatyzacyi (JS, Java).

U 2020 hodzie Viktoryja spačatku pracavała ŭ homielskim ofisie Godel Technologies Europe, a ŭ vieraśni taho ž hoda ŭładkavałasia ŭ Innowise Group. Heta vialikaja mižnarodnaja kampanija pa raspracoŭcy prahramnaha zabieśpiačeńnia i IT-kansałtynhu.

Ciapier u prafiesijnym profili Viktoryi paznačana, što jana znachodzicca ŭ doŭhaterminovym adpačynku (sabbatical).

U siaredzinie minułaha hoda dziaŭčyna trapiła pad palityčny pieraśled. A niadaŭna Viktoryju sudzili ŭ Homielskim abłasnym sudzie pavodle častak 1 i 2 artykuła 361‑4 Kryminalnaha kodeksa (sadziejničańnie ekstremisckaj dziejnaści).

Abstaviny spravy nieviadomyja. Ciapier dziaŭčyna adbyvaje pakarańnie — dzie, my pakul nie vyśvietlili. U sacsietkach jana tak i nie źjaviłasia.

«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta. 

• 0
• 0
• 0
• 1
• 4
• 7
• 16
• 0