Maładoha dalnabojščyka Dzianisa z-pad Čačerska asudzili pa palityčnaj spravie
Dzianis Maspanaŭ pracaj za rulom zabiaśpiečvaŭ žonku z dvuma dziećmi. Ale niadaŭna mužčynu asudzili za «sadziejničańnie ekstremisckaj dziejnaści».
Dzianisu Maspanavu 34 hady. Mužčyna rodam ź vioski Streńki Čačerskaha rajona Homielskaj vobłaści, u jaho žonka i dvoje małych dziaciej.
Apošnija hady Dzianis pracavaŭ dalnabojščykam. Kali pa ES stała jeździć składaniej, jeździŭ na roznych aŭto ŭ Rasiju, Kazachstan i Kitaj.
U listapadzie 2024 hoda mužčyna paśpiachova zdaŭ ekzamien na prafiesijnuju kampietentnaść kiroŭcy hruzavika ŭ rasijskim Smalensku, a taksama ličyŭsia padatkapłatnikam u Kazachstanie.
Dzianisa aryštavali ŭ minułym hodzie i źmiaścili ŭ SIZA. Jaho asudzili ŭ hetym hodzie ŭ Homielskim abłasnym sudzie pavodle častak 1 i 2 artykuła 361‑4 KK (sadziejničańnie ekstremisckaj dziejnaści).
Padobna, što pieraśled źviazany sa spravaj Hajuna. Mužčynu prysudzili chatniuju chimiju.
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach ci na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».
«Naša Niva» — bastyjon biełaruščyny
PADTRYMAĆ
Kamientary