Hałoŭnuju miedsiastru Centralnaj rajonnaj palikliniki Baranavičaŭ asudzili za palityku i vykinuli z pracy

Volzie Kazłoŭskaj 48 hadoŭ. Jana ŭsio žyćcio pražyła ŭ Baranavičach. U junactvie žančyna maryła stać jurystkaj i navat płanavała źjechać vučycca za miažu. Ale, jak jana sama raskazvała miascovaj haziecie «Naš kraj», sustreła budučaha muža i zastałasia ŭ rodnym horadzie, dzie na radaść baćkam skončyła miedycynskaje vučylišča.

Pracoŭny šlach Volhi ŭ miedycynie pačaŭsia z pasady ŭčastkovaj miedsiastry. Za hady pracy jana vyrasła da staršaj učastkovaj miedsiastry terapieŭtyčnaha adździaleńnia № 2 Baranavickaj centralnaj palikliniki. Jaje starannaść zaŭvažała kiraŭnictva: u 2016 hodzie Kazłoŭskaja ŭvajšła ŭ lik najlepšych miedykaŭ horada, jakim napiaredadni prafiesijnaha śviata ŭračysta ŭručyli hramaty ad Baranavickaha harvykankama.

Sama žančyna kaža, što palubiła svaju prafiesiju za mahčymaść dapamahać ludziam.

Pavialičyć

Z časam karjera Volhi pajšła jašče vyšej — jana zaniała pasadu hałoŭnaj miedycynskaj siastry centralnaj palikliniki, pa sutnaści kiravała ŭsim siarednim miedpiersanałam ustanovy. Na hetaj pazicyi jana stała zaŭvažnaj administratyŭnaj fihuraj, udzielničała ŭ žyćci kalektyvu i ŭračystych mierapryjemstvach.

U 2021 hodzie Kazłoŭskuju adznačyli na abłasnym uzroŭni — jana była ŭznaharodžana hanarovaj hramataj hałoŭnaha ŭpraŭleńnia achovy zdaroŭja Bresckaha abłvykankama.

Adnak niadaŭna stała viadoma, što žančynu asudzili ŭ Bresckim abłasnym sudzie. Nieviadoma, kali jaje zatrymali, ale heta adbyłosia letaś — jaje źniali z pasady i zamianili inšym čałaviekam.

Pavialičyć

Volhu pryznali vinavataj pavodle častak 1 i 2 artykuła 361‑4 Kryminalnaha kodeksa Biełarusi, sadziejničańnie ekstremisckaj dziejnaści. Zvyčajna apošnim časam pa hetym artykule sudziać za pieradaču źviestak u čat-bot prajekta Biełaruski Hajun.

Joj prysudzili chatniuju chimiju.

«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajskovuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta. 

«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach ci na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj. Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».

• 0
• 0
• 0
• 0
• 0
• 1
• 2
• 0