Галоўную медсястру Цэнтральнай раённай паліклінікі Баранавічаў асудзілі за палітыку і выкінулі з працы
Вольга Казлоўская аддала медыцыне больш за 20 гадоў, мела ўзнагароды ад аблвыканкама і кіравала сярэднім медперсаналам паліклінікі. Цяпер стала вядома, што яе судзілі па крымінальным артыкуле. Хоць Вользе прысудзілі хатнюю хімію, пасаду галоўнай медсястры цяпер займае іншы чалавек.
Вользе Казлоўскай 48 гадоў. Яна ўсё жыццё пражыла ў Баранавічах. У юнацтве жанчына марыла стаць юрысткай і нават планавала з'ехаць вучыцца за мяжу. Але, як яна сама расказвала мясцовай газеце «Наш край», сустрэла будучага мужа і засталася ў родным горадзе, дзе на радасць бацькам скончыла медыцынскае вучылішча.
Працоўны шлях Вольгі ў медыцыне пачаўся з пасады ўчастковай медсястры. За гады працы яна вырасла да старшай участковай медсястры тэрапеўтычнага аддзялення № 2 Баранавіцкай цэнтральнай паліклінікі. Яе стараннасць заўважала кіраўніцтва: у 2016 годзе Казлоўская ўвайшла ў лік найлепшых медыкаў горада, якім напярэдадні прафесійнага свята ўрачыста ўручылі граматы ад Баранавіцкага гарвыканкама.
Сама жанчына кажа, што палюбіла сваю прафесію за магчымасць дапамагаць людзям.
З часам кар'ера Вольгі пайшла яшчэ вышэй — яна заняла пасаду галоўнай медыцынскай сястры цэнтральнай паліклінікі, па сутнасці кіравала ўсім сярэднім медперсаналам установы. На гэтай пазіцыі яна стала заўважнай адміністратыўнай фігурай, удзельнічала ў жыцці калектыву і ўрачыстых мерапрыемствах.
У 2021 годзе Казлоўскую адзначылі на абласным узроўні — яна была ўзнагароджана ганаровай граматай галоўнага ўпраўлення аховы здароўя Брэсцкага аблвыканкама.
Аднак нядаўна стала вядома, што жанчыну асудзілі ў Брэсцкім абласным судзе. Невядома, калі яе затрымалі, але гэта адбылося летась — яе знялі з пасады і замянілі іншым чалавекам.
Вольгу прызналі вінаватай паводле частак 1 і 2 артыкула 361‑4 Крымінальнага кодэкса Беларусі, садзейнічанне экстрэмісцкай дзейнасці. Звычайна апошнім часам па гэтым артыкуле судзяць за перадачу звестак у чат-бот праекта Беларускі Гаюн.
Ёй прысудзілі хатнюю хімію.
«Беларускі Гаюн» — маніторынгавы OSINT-праект, які быў створаны ў 2022 годзе, калі Расія праз Беларусь напала на Украіну. Праект адсочваў вайсковую актыўнасць расійскіх і беларускіх войскаў, абапіраючыся на інфармацыю ад беларусаў. Каардынавала яго дзейнасць група актывістаў на чале з Антонам Матолькам.
Справа Гаюна пачалася пасля таго, як сілавікі затрымалі актывістку, якая некалькі гадоў жыла ў Беларусі ў падполлі. У яе мабільніку знайшлі спасылку на далучэнне ў бот Гаюна, якую ёй дасылалі ў самым пачатку існавання праекта. Фатальная памылка была ў тым, што спасылка была бестэрміновая. А таму сілавікі змаглі падключыцца да бота і выпампаваць адтуль усю інфармацыю. Яны атрымалі паведамленні акаўнтаў, якія пісалі ў бот, а таксама іхнія ID і імёны карыстальнікаў.
Заснавальнік Гаюна Антон Матолька адразу пасля ўзлому патлумачыў, як адбыўся выцек інфармацыі і абвясціў пра закрыццё праекта.
«Экстрэмізмам» улады Беларусі лічаць падпіскі на незалежныя каналы, СМІ, наяўнасць спасылак на іх у сацыяльных сетках ці наяўнасць у сацсетках ці на рэчах беларускай нацыянальнай, далукашэнкаўскай сімволікі. Да «экстрэмізму» залічваюць таксама практычна ўсялякую крытыку ўладаў, афіцыйных гістарычных наратываў ці праявы салідарнасці з Украінай. Шматлікія крымінальныя справы апошняга часу па артыкуле аб «садзейнічанні экстрэмізму» былі звязаныя са «справай Гаюна».
«Наша Нiва» — бастыён беларушчыны
ПАДТРЫМАЦЬ
Каментары
Чаму той, хто прыходзіць на месца выкінутага, аддаўшага 20-ць гадоў сваёй справе, застаецца у цені?
Публікуйце фота і таго, хто прыйшоў на месца выкінутага і на хіміі. У вагні броду няма.