Farmvytvorcy abiacajuć novyja mahutnyja leki dla źnižeńnia drennaha chalesterynu
Sučasnaja kardyjałohija staić na parozie źjaŭleńnia novaha kłasa preparataŭ, zdolnych uździejničać na lipapratein (a) — čaścicu ŭ kryvi, jakaja dziesiacihodździami ličyłasia niepaduładnaj lačeńniu. Kali kliničnyja vyprabavańni paćvierdziać svaju efiektyŭnaść, heta moža kardynalna źmianić padychody da prafiłaktyki infarktaŭ i insultaŭ u miljonaŭ ludziej pa ŭsim śviecie.
Sardečna-sasudzistyja zachvorvańni zastajucca hałoŭnaj pryčynaj śmierci ŭ śviecie, i zvyčajna hałoŭnym vinavatym ličać «drenny» chalesteryn (LDL). Ale isnuje jašče adna značna mienš viadomaja pahroza — lipapratein (a), abo Lp(a). Heta raznavidnaść LDL, jakaja nie tolki spryjaje nazapašvańniu blašak u sasudach, ale i pavialičvaje schilnaść arhanizma da ŭtvareńnia trombaŭ. Mienavita tamu kardyjołahi ličać jaho adnym z najbolš niebiaśpiečnych faktaraŭ ryzyki infarktaŭ i insultaŭ.
Asablivaja prablema ŭ tym, što čałaviek amal nie moža paŭpłyvać na ŭzrovień Lp(a). Kala 90% hetaha pakazčyka zakładziena hienietyčna jašče pry naradžeńni. Ni zdarovaje charčavańnie, ni fizičnaja aktyŭnaść praktyčna nie źnižajuć jaho kancentracyju ŭ kryvi. Bolš za toje, navat statyny — asnoŭnyja leki dla baraćby z chalesterynam — u niekatorych vypadkach mohuć pavyšać uzrovień Lp(a).
Pavodle acenak śpiecyjalistaŭ, niebiaśpiečna vysoki ŭzrovień hetaj čaścicy maje prykładna kožny piaty čałaviek u śviecie. Pry hetym bolšaść ludziej navat nie padazraje ab prablemie, bo da niadaŭniaha času analiz na Lp(a) pryznačaŭsia redka. Miedyki nie bačyli sensu ŭ dyjahnostycy faktaru ryzyki, na jaki niemahčyma było paŭpłyvać miedykamientozna.
Pacyjenty časta daviedvalisia pra svaju asablivaść tolki paśla taho, jak pieranosili infarkt u maładym vieku ci sutykalisia ź ciažkimi sasudzistymi ŭskładnieńniami, niahledziačy na zachavańnie zdarovaha ładu žyćcia. Tolki sioleta miedycynskija arhanizacyi abnavili rekamiendacyi i zaklikali šyrej praviarać hety pakazčyk.
Navukoŭcy sprabujuć znajści rašeńnie ŭžo bolš za 60 hadoŭ. Raniej byli stvorany preparaty, jakija mahli krychu źnižać uzrovień Lp(a), ale jany nie davali hałoŭnaha vyniku — nie pamianšali kolkaść infarktaŭ i insultaŭ. Tamu prablema zastavałasia adnoj z hałoŭnych nierazhadanych zadač kardyjałohii.
Adnak situacyja pačała mianiacca z raźvićciom hiennych technałohij. Navukoŭcy raspracavali mietady, jakija dazvalajuć atakavać prablemu niepasredna ŭ miescy jaje ŭźniknieńnia — na ŭzroŭni sintezu białku. Z padrabiaznaściami znajomić The Wall Street Journal.
Adrazu niekalki bujnych farmaceŭtyčnych kampanij raspracoŭvajuć leki, jakija dziejničajuć niepasredna na miechanizm vypracoŭki Lp(a).
Najbolš daloka prasunulisia Novartis i Ionis Pharmaceuticals. Ich ekśpierymientalny preparat błakuje sihnał, jaki prymušaje piečań vypracoŭvać Lp(a). Vyniki finalnaj stadyi kliničnych vyprabavańniaŭ mohuć stać viadomyja ŭžo hetym letam.
Kali daśledavańnie pakaža, što leki sapraŭdy źnižajuć kolkaść infarktaŭ, insultaŭ i śmierciaŭ, preparat mohuć uchvalić užo ŭ nastupnym hodzie.
Svaje raspracoŭki taksama viaduć Amgen i Eli Lilly. Ich preparaty vykarystoŭvajuć inšuju technałohiju — faktyčna «adklučajuć» hien, adkazny za vypracoŭku Lp(a). Amgen čakaje vynikaŭ svaich daśledavańniaŭ u najbližejšyja hady, a Eli Lilly — da 2029 hoda.
Kali novyja preparaty paćvierdziać efiektyŭnaść, rynak moža atrymać adzin z najbujniejšych praryvaŭ u sučasnaj kardyjałohii. Analityki Citi aceńvajuć patencyjny suśvietny abjom prodažaŭ takich lekaŭ u 25 miljardaŭ dołaraŭ na hod. Ale zastajucca adkrytyja pytańni — kamu mienavita buduć pryznačać novaje lačeńnie i kolki jano budzie kaštavać.
Ciapier čytajuć
65‑hadovaha hamielčuka asudzili za sprobu dyviersii na čyhuncy i zdradu dziaržavie. Što viadoma?4
Kamientary