Doktar raspaviała, jakija pradukty dapamohuć źnizić uzrovień chalesterynu biez tabletak

Ci jość alternatyva statynam, u efiry tok-šou «PRO ZDAROŬJE» raspaviała doktar Tamara Turbinskaja, piša sb.by.

— Jość raślinnyja kampanienty, jakija nazyvajucca fitasteroły. Jany ŭtrymlivajucca ŭ mnohich praduktach charčavańnia, u tym liku ŭ raślinnaj klatčatcy, — adznačyła doktarka.

Pavodle jaje słoŭ, dastatkova klatčatki ŭtrymlivajecca ŭ 1,5 kubkach aŭsianaj kašy.

— Pryčym havorka nie pra šmatki, a pra krupy, jakija treba zamočvać na noč i varyć paŭhadziny. Pry rehularnym pryjomie chalesteryn źnižajecca na 10—15%, — kaža śpiecyjalist.

Dapamahčy moža i harbuzovaja klatčatka.

— Jana pradajecca, heta dastupna, — havoryć Tamara Turbinskaja. — Možna kuplać klatčatku z nasieńnia lonu i rastaropšy. Vaźmicie pałovu čajnaj łyžki, raźmiašajcie ŭ 0,5‑1 šklancy vady (ciopłaj ci pakajovaj tempieratury), prymajcie dva razy na dzień razam ź ježaj. Možna zamiest hetaha dadavać u stravy, naprykład, u kašu.

Jašče adzin efiektyŭny pradukt dla źnižeńnia ŭzroŭniu «drennaha» chalesterynu — babovyja. Ich taksama možna dadavać u svoj racyjon 2‑3 razy na tydzień. Užyvać ich varta nie ŭ syrym vyhladzie, lepš varyć ci zapiekčy.

Fitasteroły taksama ŭtrymlivajucca ŭ arechach i kunžucie. Aptymalnaja dzionnaja norma arechaŭ — kala 30 h.

— Heta, naprykład, vosiem hreckich arechaŭ. Ale jany pavinny być nie salonyja, nie smažanyja, nie hłazuravanyja. Ich treba jeści śviežymi ci źlohku padsušanymi ŭ duchoŭcy. Lepš užyvać ich da 17:00, — raspaviała Tamara Turbinskaja.

Doktarka źviarnuła ŭvahu na jašče adzin momant, jaki ŭpłyvaje na chalesteryn:

— Upłyvaje toje, a jakoj hadzinie vy śniedajecie ranicaj. Z ranicy arhanizm užo hatovy da taho, kab pajeści. Kali vy pračynajeciesia i doŭha raskačvajeciesia, na praciahu hadziny ničoha nie jaście, — heta ŭdar pa žoŭcievym puzyry.

Taksama adyhryvaje rolu fizičnaja nahruzka. Ličycca, što dapamahaje 150 chvilin aktyŭnaha ruchu na tydzień. I heta nie chada. Aktyŭny ruch — heta kali puls pačaściŭsia da 100 i čałaviek spacieŭ.

Pavodle słoŭ śpiecyjalista, važna taksama vykonvać režym snu i niaspańnia.

— Kali čałaviek mianiaje miescami dzień i noč, varta ŭličvać, što arhanizm pry naradžeńni zatočany na inšaje. Tamu tema chalesterynu dla jaho budzie aktualnaja. Značna lepš, kali vy kładzieciesia ŭ adzin i toj ža čas, aptymalna — z 22:00 da 23:00, i śpicie nie mienš za 6‑8 hadzin, — dadała Tamara Turbinskaja.

• 9
• 1
• 0
• 1
• 3
• 1
• 0
• 1