Tenisistka raskazała, jak adčuvaje siabie paśla insultu ŭ 33 hady
Lidzija Marozava ŭ minułym była tenisistkaj, a ciapier zajmajecca trenierstvam. U sakaviku dziaŭčyna atrymała dyjahnaz, jakoha ŭ jaje ŭzroście zusim nie čakaješ, a ŭ červieni raskazała, što ciapier u jaje čuvać.
13 sakavika Lidzija pakinuła ŭ instahramie zapis, dzie zhadała, što pieražyła insult:
«Heta ja kajfuju ad pryhožaha ranišniaha špacyru z Džakiendam (sabakam — NN) za chvilin dziesiać da taho, jak u mianie adnimiecca levaja častka cieła».
Lidzija redka raskazvaje pra svajo žyćcio publična, ale dla historyi ź insultam jana zrabiła vyklučeńnie. Dziaŭčyna źviartaje ŭvahu, što insulty ŭsio čaściej zdarajucca ŭ ludziej, małodšych za 40 hadoŭ. Tamu varta lepš dbać pra svajo zdaroŭje i prafiłaktyku chraničnych chvarob, jakija mohuć dadać ryzyki insultaŭ.
Pieražyć taki dośvied Lidzii było niaprosta:
«Ciapier šmat emocyj i pieražyvańnia roznaha śpiektru i heta składana. Ale dziakujučy kałasalnaj padtrymcy i biezumoŭnaj lubovi ad rodnych i blizkich (i, viadoma, ahromnistaj kolkaści maich lubimych bukiecikaŭ) u mianie nie prosta źjaŭlajecca ŭpeŭnienaść — ja prosta adčuvaju i viedaju, što ŭsio abaviazkova budzie dobra».
Užo 6 krasavika Lidzija, jakaja žyvie ŭ Varšavie, napisała post z zaprašeńniem prychodzić da jaje na treniroŭki pa tenisie. 8 maja dziaŭčyna apublikavała videa, dzie jana hraje ŭ tenis.
A 12 červienia Lidzija apublikavała ŭ storyz videa sa svajoj pieršaj prabiežki paśla insultu. Jana nie strymlivaje emocyj:
«U nas naviny, u nas try kiłamietry ŭ hetaj biehavoj kišeni praz mnohaje. Z dobraha ŭ nas jašče para navinaŭ: ja chadžu, ja idu, ja nie nakiroŭvajusia ŭ kardyjałahičny centr. Z tak sabie navinaŭ — znoŭ naha vyjšła z čata, ale heta drobiaź.
Heta vielmi emacyjna, ale ja tak rada, božački. Svaimi nahami, i sercajka jašče amal svajo biłasia, i ŭsio ŭdałosia».
Lidzija šmat hadoŭ vystupała na mižnarodnych tenisnych turnirach, śpiecyjalizavałasia na parnym razradzie. Jana maje čatyry tytuły WTA u parnym razradzie, niekalki razoŭ dachodziła da finałaŭ turniraŭ, ale z 2025 hoda ŭžo nie vystupaje. Taksama Lidzija vystupała i za biełaruskuju zbornuju pa tenisie.
U lutym 2024‑ha Marozava stała adnoj z suzasnavalnic varšaŭskaj kaviarni Just Like You.
«Naša Niva» — bastyjon biełaruščyny
PADTRYMAĆ
Biełaruskaha Siniuju Baradu adpuścili z rasijskaj turmy pamirać doma6
Biełaruskaha Siniuju Baradu adpuścili z rasijskaj turmy pamirać doma
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu1313
Kamientary
Zdaroŭja joj i pośpiechaŭ. I ŭsim našym zdaroŭja :)