«Samym sinim byŭ Hienadź». Jak eks-padpałkoŭnika źbili za ŭdzieł u pratestach

Mienavita tam jaho sustreŭ były žurnalist i palitviazień Ihar Karniej. Jany spali pobač na bietonnaj padłozie, ucisnutyja pamiž inšymi viaźniami. Karniej uzhadaŭ pra svajho byłoha sukamiernika ŭ frahmiencie svajoj budučaj knihi.

«Paŭtaraŭ, što nikoli nie daruje»

17 lipienia 2023 hoda Ihar Karniej paśla pieratrusu, zatrymańnia i dopytu trapiŭ u izalatar na Akreścina. Karcar, raźličany na adnaho čałavieka, byŭ pierapoŭnieny: na piaci z pałovaj kvadratnych mietrach znachodzilisia dziesiać viaźniaŭ.

U niekatorych na ciele zastavlisia ślady źbićcia. Ale najbolš paciarpiełym, pavodle ŭspaminaŭ Karnieja, vyhladaŭ Hienadź:

«Samym sinim byŭ Hienadź, jaki pry kožnym uzdychu z balučaj hrymasaj chapaŭsia za pierałomanyja rebry».

Pavodle taho, što Majsiejčyk raskazvaŭ u kamiery, jaho zatrymlivali cełym aŭtobusam «kasmanaŭtaŭ». Padčas zatrymańnia siłaviki źbili jahonaha syna, a kali baćka kinuŭsia jaho abaraniać, pačali bić i samoha Majsiejčyka — dubinkami, nahami i kułakami.

«Paŭtaraŭ, što nikoli nie daruje — razam na horki jabłyk źbili i biezabaronnaha syna-invalida», — uzhadvaje Ihar Karniej raspoviedy sukamiernika.

Paśla źbićcio praciahnułasia ŭ budynku RUUS, u kabiniecie, dzie niekali pracavaŭ sam Majsiejčyk.

Bolš za dvaccać hadoŭ u milicyi

Hienadź Majsiejčyk naradziŭsia 25 maja 1974 hoda i pryjšoŭ u milicyju nie paźniej za 1994-y. Bolšaja častka jahonaj karjery, pa infarmacyi z bazaŭ Belpol, była źviazanaja z achovaj hramadskaha paradku i pracaj ź niepaŭnaletnimi.

U žniŭni 1994 hoda Majsiejčyk pracavaŭ učastkovym inśpiektaram Leninskaha RUUS Minska. Praz hod pierajšoŭ u inśpiekcyju pa spravach niepaŭnaletnich. Byŭ učastkovym, paśla staršym učastkovym inśpiektaram, a ŭ 2001 hodzie ŭznačaliŭ inśpiekcyju pa spravach niepaŭnaletnich Leninskaha RUUS.

Paźniej Majsiejčyk pierajšoŭ u Maskoŭskaje RUUS. Na pačatak 2015 hoda jon zajmaŭ pasadu namieśnika načalnika adździeła achovy pravaparadku i prafiłaktyki i mieŭ zvańnie padpałkoŭnika milicyi.

Jaho zvolnili z pracy ŭ červieni 2015 hoda. U bazach zapisana, što padstavaj staŭ prahuł.

U archivie sajta administracyi Maskoŭskaha rajona zachavaŭsia jahony kamientar pra chatni hvałt. Ad imia milicyi Majsiejčyk zaklikaŭ paciarpiełych nie maŭčać i papiaredžvaŭ, što siamiejnyja kanflikty mohuć zakančvacca asabliva ciažkimi złačynstvami.

«Nijaki hvałt u siamji nie moža być apraŭdany», — havaryłasia ŭ toj publikacyi.

Hienu złamali nasavuju pieraharodku

Pavodle pierakazu Ihara Karnieja, u 2020 hodzie Hienadź Majsiejčyk vychodziŭ na akcyi pratestu. Jaho nibyta zafiksavali videakamiery, ale pryjšli pa byłoha milicyjanta tolki praz try hady: jaho zatrymali ŭ Minsku 12 lipienia 2023 hoda. 

Praź piać dzion paśla zatrymańnia Majsiejčyka ŭ toj ža karcar na Akreścina trapiŭ Ihar Karniej. «Hienu, miarkujučy pa ŭsim, złamali i nasavuju pieraharodku, chrap na vyšejšych decybiełach», — zhadvaje jon.

Pavodle Karnieja, paśla Akreścina Majsiejčyka adpravili ŭ Žodzina, a paźniej sukamierniki znoŭ pabačylisia na Vaładarcy.

21 vieraśnia 2023 hoda sud Pieršamajskaha rajona Minska pryznaŭ Hienadzia Majsiejčyka vinavatym pa narodnym artykule 342 Kryminalnaha kodeksu i pryznačyŭ jamu try hady chatniaj chimii.

Praz hod pazbavili zvańnia

Ale prysudam historyja nie skončyłasia. U listapadzie 2024 hoda proźvišča Majsiejčyka źjaviłasia va ŭkazie Łukašenki ab pazbaŭleńni byłych siłavikoŭ voinskich i śpiecyjalnych zvańniaŭ.

Ułady zajavili, što ludzi sa śpisa ŭ 2020 hodzie ździejśnili dziejańni, «niesumiaščalnyja sa statusam vajskoŭca». Hienadzia Majsiejčyka pazbavili zvańnia padpałkoŭnika milicyi zapasu.

• 0
• 1
• 0
• 4
• 2
• 5
• 20
• 0