Łaŭreatami premii imia Michała Aniempadystava za najlepšuju knižnuju vokładku 2025 hoda stali Lina Chiese i Ihar Juchnievič. Uznaharodu im prysudzili za afarmleńnie knihi «Biespracoŭnaje dreva» Śviety Bień i Liny Chiese, jakaja vyjšła ŭ vydaviectvie «Mianie Niama» ŭ 2025 hodzie, paviedamlaje Biełaruski PEN.
Cyrymonija ŭznaharodžańnia adbyłasia 24 kastryčnika ŭ Varšavie. Žury adznačyła pracu «za majsterskuju hulniu pamiž kraftam i pop-artam, za dziciačuju adkrytaść, za darosły simvalizm».
Pa słovach siabry žury Nadziei Zielankovaj, kniha-pieramožca značna apiaredziła astatnija pracy. Jana adznačyła, što dziciačyja knihi zvyčajna redka traplajuć navat u karotkija śpisy padobnych konkursaŭ, adnak u hetym vypadku dyzajnierskaje rašeńnie adrazu zavajavała pryznańnie žury.
Sioleta ŭ karotki śpis premii ŭvajšli vosiem rabot, jakija prademanstravali raznastajnaść mastackich padychodaŭ da afarmleńnia knih.
Cyrymonija prajšła ŭ varšaŭskim REDAKCJA BAR i sabrała pradstaŭnikoŭ biełaruskaj kulturnaj i knižnaj supolnaści. U prahramie byli vystava «Vosiem vokładak jak vosiem historyj», prezientacyja vydańnia «Forma prysutnaści», pryśviečanaha biełaruskaj knižnaj vokładcy, i dyskusija pra vokładku jak vizualny vobraz knihi. Paśla aficyjnaj častki adbylisia muzyčny set Papa Bo Selektah i niefarmalnyja razmovy ŭdzielnikaŭ.
Premija imia Michała Aniempadystava zasnavanaja ŭ 2019 hodzie. Jana adznačaje najlepšyja dyzajnierskija rašeńni ŭ afarmleńni knižnych vokładak i spryjaje raźvićciu vizualnaj kultury biełaruskaj knihi. Jaje arhanizatary — Biełaruski PEN i fond Open Culture.
Siarod papiarednich łaŭreataŭ — Ryhor Kacnelson za vokładku knihi «Vilenski pokier», Alena Daškievič za vydańnie «Prostyja słovy. Michał Aniempadystaŭ», Anatol Łazar za knihu «(Nie)rasstralanyja», Jana Hałuškina i ličbavy archiŭ VEHA za «Ludzi Lesu / Ludzi Lesu», Śviatłana Dziemidovič i Łukaš Levandoŭski za «Pobač», a taksama Maša Maroz i Ihar Juchnievič za knihu «Moje baba — diriektor morha».
Ciapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec121
Kamientary