«U dziaŭčyny byŭ dypłamatyčny imunitet — ad rasijskaj ambasady». Jak ahienty sprabavali trapić na kanfierencyi z udziełam biełarusaŭ
Nie adnamu Paŭłu Sieviaryncu davodziłasia łavić ahientaŭ na mierapryjemstvach. Miedyjamieniedžarka Maryja Sadoŭskaja-Kamłač raskazała «Našaj Nivie», na jakija vynachodnictvy zdolnyja ludzi na zadańni, kab trapić tudy, kudy ich nie klikali.
Maryja zhadvaje, jak u pačatku 2019‑ha ŭ Prazie adbyvałasia bujnaja kanfierencyja z udziełam miedyjščykaŭ z usiaho śvietu. Sadoŭskaja-Kamłač tady była adnoj z suarhanizatarak. Hałoŭnuju častku pravodzili ŭ adnym z pražskich hatelaŭ, a da pamiaškańniaŭ, dzie ŭsio adbyvałasia, možna było trapić vyklučna pa śpisach udzielnikaŭ.
«U restaranie hatela byŭ zapłanavany abied. Kali my viartalisia ź jaho ŭ pamiaškańnie, zaŭvažyli: naša kaleha, jakaja złamała nahu, razmaŭlaje ź dziaŭčynaj, jakaja viazie jaje invalidny vazok. Pry hetym my nie pamiatajem imia hetaj udzielnicy.
Jany amal uvajšli ŭ zału, kali my spynili ich i paprasili ŭdzielnicu skazać, adkul jana. Taja pradstaviłasia pierakładčycaj. Kali my zapytali, ź jakoj na jakuju movu, akazałasia, što z anhlijskaj na ruskuju. Na ruskaj movie va ŭsioj kanfierencyi razmaŭlali tolki ja, maja kaleha i jašče adzin ci dva čałavieki ź vielmi dobraj anhlijskaj».
Dziaŭčyna ŭsio roŭna nastojvała, što jana pierakładčyca, jakuju naniali na kanfierencyju, i što arhanizatary pieraškadžajuć joj pracavać. Jany źviarnulisia pa dapamohu da hatela, i supracoŭniki vyklikali palicyju. Pakul jaje čakali, u hatel zvanili ludzi, jakija pradstaŭlalisia najmalnikami tak zvanaj pierakładčycy, i pahražali arhanizataram za toje, što joj nibyta nie dajuć pracavać.
Vynik byŭ niečakany:
«Kali palicyja źjaviłasia i paprasiła dakumienty, dziaŭčyna skazała, što ŭ jaje dypłamatyčny imunitet ad rasijskaj ambasady, i jaje ŭsio roŭna adpuściać. Na toj momant u pražskaj ambasadzie Rasii było bolš za 100 akredytavanych dypłamataŭ, heta byŭ hałoŭny centr pa sačeńni za padziejami ŭ Centralnaj i Uschodniaj Jeŭropie. Tamu toje, što niechta moh być adkamandziravany na takuju rolu, nie ździviła».
Maryja była śviedkaj i inšych padziej, infarmacyja ź jakich traplała da niepažadanych asobaŭ. Jana ŭspaminaje, jak paśla kanfierencyi ŭ Niderłandach na ruskamoŭnym sajcie vyjšli prapahandysckija artykuły pra destruktyŭnuju infarmacyjnuju dziejnaść.
I navat zakryty farmat mierapryjemstva nie zaŭždy ratuje. Prykładna ŭ 2016‑-2017 hadach u Ryzie pravodzili kanfierencyju, dzie Maryja źviarnuła ŭvahu na dziŭnaha mužčynu:
«Jon sačyŭ za tymi, chto ŭvachodzić i vychodzić z zały, u bary la jaho, niekalki hadzin paciahvajučy adno i toje ž piva. Narešcie hety čałaviek nie vytrymaŭ i padyšoŭ da mianie i jašče adnoj dziaŭčyny la dźviarej — u nas byli bejdžy ŭdzielnic. I spytaŭ, ci vyjšli ŭžo z zały supracoŭniki peŭnaha miedyja.
Ja ledź aŭtamatam nie adkazała praŭdu, a paśla zrazumieła mahčymuju pryčynu pytańnia i zapytałasia ŭ adkaz: «A chto heta takija?»
U vyniku mužčynie daviałosia ŭžo samomu raspaviadać Maryi historyju taho miedyja. Pry hetym, kaža jana, jon nie pradstaviŭsia. A nichto z taho miedyja nie płanavaŭ ź im sustrečy, dy i ŭvohule ich udzieł u prahramie nie byŭ zajaŭleny.
Nikoli nielha vyklučyć, kaža Maryja, što siarod udzielnikaŭ padziei nie znojdziecca čałaviek, jaki śviadoma ci nieśviadoma budzie pieradavać infarmacyju trecim asobam ci arhanizacyjam.
«Naša Niva» — bastyjon biełaruščyny
PADTRYMAĆCiapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec121
Kamientary