Piać faktaŭ pra tajamničaha Valeryja Vakulčyka

1. Nieviadoma, dzie naradziŭsia

Hienierał-major justycyi Valer Vakulčyk, u adroźnieńnie ad mnohich inšych siłavikoŭ, zaŭždy trymaŭ siabie ŭ cieni, nidzie nie pijaryŭsia, nie vychodziŭ na pieršyja roli. Redkija jahonyja pres-kanfierencyi, jašče radziejšyja intervju. Viadoma, što jon naradziŭsia ŭ Bresckaj vobłaści, ale ŭ jakim rajonie, u jakoj vioscy — heta, napeŭna, lišniaje. Toje samaje niekali było ź bijahrafijaj raźviedčyka Uładzimira Makieja. Vakulčyk skončyŭ vyšejšyja kursy vajskovaj kontrraźviedki KDB. A pierad hetym Charkaŭskaje hvardziejskaje vyšejšaje tankavaje vučylišča.

2. Apieratyŭna-analityčny centr

U struktury orhanaŭ dziaržbiaśpieki Valer Vakulčyk prachodziŭ ad 1991 hoda, ale ŭpieršyniu jahonaje proźvišča prahučała tolki ŭ 2008. Tady pry Łukašenku była ŭtvoranaja novaja śpiecsłužba, jakuju ŭznačaliŭ Vakulčyk. Pałochali, što mienavita Apieratyŭna-analityčny centr budzie zajmacca palityčnymi spravami. Ale, prynamsi, naŭprostavych śviedčańniaŭ, što AAC zajmajecca ciskam na inšadumcaŭ, nie było. Raźmiaščaŭsia Centr u budynku KDB, darečy.

3. Internet

Siarod pryjarytetnych zadač AAC značycca: «Vyznačaje pryjarytetnyja kirunki techničnaj abarony infarmacyi». Mienavita hetaj śpiecsłužbie była davieranaja raspracoŭka ŭkaza «Ab mierach pa ŭdaskanaleńni vykarystańnia nacyjanalnaha siehmienta sietki Internet». Pieršapačatkovy varyjant, jaki trapiŭ u ŚMI, byŭ dosyć nieadnaznačny. Pad kantrol hetaj słužby trapili ŭsie internet-pravajdary. U vyniku ŭkaz vyjšaŭ u «pryhožaj abhortcy», jak skazaŭ tady palityčny analityk Kłaskoŭski. Niejki čas pad zabaronu traplali «Chartyja-97», «Biełaruski partyzan» i błoh Jaŭhiena Lipkoviča, ale hetyja sajty pa-raniejšamu dastupnyja karystalnikam u Biełarusi. Chacia pa prośbie ci patrabavańni čynoŭnikaŭ, biznesoŭcaŭ ci prostych hramadzian mohuć być adklučanyja doma ci na pradpryjemstvach. U dzień prezidenckich vybaraŭ byli vyklučanyja niezaležnyja sajty, Fejsbuk, Gmail. Ale padobnaje rabiłasia i da ŭzhadanaha ŭkaza.

Jašče cikavyja zadačy AAC zaklučalisia ŭ zabiaśpiečańni abarony sajta prezidenta, a taksama praviadzieńni ekśpiertyz rozyhryšaŭ łatarejaŭ.

4. Niechta nie lubić, niechta niedalublivaje

«Vielmi važna, što ŭ siłavych strukturach vy karystajeciesia zasłužanaj pavahaj. Chtości vas nie lubić, chtości niedalublivaje, ale tolki z adnoj pryčyny: praz vašu sumlennaść i pryncypovaść. Mnie patrebien taki čałaviek pry stanaŭleńni hetaj struktury», — takoj vysokaj acenki Vakulčyk zasłužyŭ ad Łukašenki, kali kiraŭnik dziaržavy pryznačaŭ jaho na pasadu kiraŭnika Śledčaha kamiteta. «Vy majecie ŭvachod va ŭsie struktury, karystajeciesia padtrymkaj i davieram prezidenta — lepšaha čałavieka i nie znojdzieš».

5. Taksama z pamiežnikaŭ

Valeryj Vakulčyk, jak i były staršynia KDB Zajcaŭ, i Račkoŭski, i Viktar Łukašenka, taksama pryjšoŭ z pamiežnikaŭ, da AAC jon byŭ načalnikam vajskovaj kontrvyviedki pamiežnych vojskaŭ. A jašče raniej pracavaŭ asabistam u Bresckim pahranatradzie. Jahony ŭźlot jakraz i źviazvajuć ź imionami Viktara Łukašenki i Račkoŭskaha. Pavodle niekatorych źviestak, u svoj čas Vakulčyk pieranios ciažkuju chvarobu, jakaja navat pahražała jamu kamisavańniem. Ale nijakich aficyjnych paćvierdžańniaŭ hetamu niama: infarmacyju publikavaŭ tolki aryjentavany na čutki «Biełaruski partyzan». U Śledčym kamitecie Vakulčyk kuryravaŭ hučnyja spravy suprać čynoŭnikaŭ. Naprykład, namieśnika ministra Południa, byłoha staršyni Połackaha harvykankama Tačyły, bankira Kacarenki. Z palityčnych spravaŭ mienavita Śledčy kamitet viadzie spravu žurnalista Andreja Pačobuta, jakaja pakul u padviešanym stanie.

• 1
• 0
• 0
• 0
• 0
• 0
• 0
• 0