U matracy i paścielnaj bialiźnie mohuć žyć sotni tysiač mikraskapičnych klaščoŭ, jakija zdolnyja vyklikać alerhiju. I toje, što my robim z łožkam adrazu paśla abudžeńnia, moža ŭpłyvać na ŭmovy ich žyćcia.
Dla mnohich ludziej ranica pačynajecca z prostaha rytuału: pračnucca, adsunuć štory i zasłać łožak. Heta dapamahaje adčuć, što novy dzień pačaŭsia, a ŭ spalni adrazu stanovicca bolš prybrana. Ale mienavita z apošnim punktam śpiašacca nie varta, piša IFLScience.
Pakul my śpim, arhanizm praciahvaje pracavać. My dychajem, paciejem i vydzialajem ciapło, kab padtrymlivać narmalnuju tempieraturu cieła. U vyniku za noč u paścieli nazapašvajecca vilhać. Razam z admierłymi čaścinkami skury jana stvaraje spryjalnyja ŭmovy dla pyłavych klaščoŭ.
Hetyja mikraskapičnyja pavukapadobnyja istoty žyvuć u matracach, paduškach, koŭdrach i miakkaj mebli i siłkujucca admierłymi kletkami čałaviečaj skury. U adnym łožku ich mohuć być sotni tysiač, choć zaŭvažyć ich niaŭzbrojenym vokam niemahčyma. Asabliva dobra klaščy adčuvajuć siabie ŭ paścielnaj bialiźnie, bo padčas snu skura pastajanna ź joj kantaktuje.
Samich ludziej pyłavyja klaščy nie kusajuć i pad skuru nie pranikajuć. Prablemu stvarajuć ich ekskremienty i reštki ciełaŭ, jakija ŭtrymlivajuć alerhieny.
Pavodle ekśpiertaŭ, pyłavyja klaščy źjaŭlajucca adnoj z samych raspaŭsiudžanych pryčyn alerhii ŭ chatnich umovach. Jany mohuć vyklikać čchańnie, nasmark i vysypańni na skury, a ŭ ludziej z astmaj pravakavać jaje abvastreńnie. Alerhieny pyłavych klaščoŭ vyjaŭlajucca prynamsi ŭ adnym łožku prykładna ŭ čatyroch ź piaci amierykanskich damoŭ.
Kab źmienšyć kolkaść pyłavych klaščoŭ, śpiecyjalisty rekamiendujuć rehularna myć paścielnuju bializnu i pyłasosić matrac. Ale jość jašče adna prostaja parada: nie śpiašacca zaściłać łožak adrazu paśla abudžeńnia.
Lepš adkinuć koŭdru i dać praścinie i matracu pravietrycca. Tak vilhać, jakaja nazapasiłasia za noč, budzie chutčej vyparacca, a ŭmovy dla pyłavych klaščoŭ stanuć mienš spryjalnymi.
Dadatkova moža dapamahčy soniečnaje śviatło. Ultrafijaletavaje vypramieńvańnie pry dastatkovaj intensiŭnaści zdolnaje źniščać klaščoŭ, a taksama niekatoryja bakteryi i hrybki.
Ciapier čytajuć
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja10
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary
[Zredahavana]