Камандзір на мянушку «Юра Унітаз». Расійскія беспілотныя войскі можа ўзначаліць былы гандляр сантэхнікай
У Расіі закончылася фармаванне новага роду войскаў — войскаў беспілотных сістэм. Хоць афіцыйна імя камандзіра яшчэ не названа, расійскія z-блогеры» і крыніцы BBC заяўляюць: на гэтую пасаду прызначаны бізнэсовец без вайсковай адукацыі Юрый Ваганаў, вядомы ў вузкіх колах як «Юра Унітаз».
Расія афіцыйна завяршыла фармаванне новага роду войскаў — войскаў беспілотных сістэм, аднак імя іх кіраўніка дагэтуль трымаецца ў сакрэце. Тым не менш, расійскія блогеры і крыніцы Рускай службы Бі-бі-сі аднагалосна сцвярджаюць, што камандзірам прызначаны Юрый Ваганаў — бізнэсовец з падмаскоўнай Электрасталі, які да вайны не меў ніякага дачынення да войска.
Гэтае прызначэнне выклікала сапраўдны шал сярод прыхільнікаў уварвання.
Ваганаў атрымаў шырокую вядомасць у вузкіх колах пад зневажальнай мянушкай «Юра Унітаз». Як патлумачыў падчас свайго стрыму z-блогер, капітан 3‑га рангу ў запасе Максім Клімаў, такая назва прыклеілася да бізнэсмэна таму, што да пачатку поўнамаштабнага ўварвання той гандляваў сантэхнікай і не меў нават базавай вайсковай адукацыі.
Са слоў Клімава, пасля пачатку вайны Ваганаў «стаў манапалістам у пытанні пастаўкі FPV расійскім войскам», выкарыстоўваючы адміністрацыйны рэсурс і сувязі ў Міністэрстве абароны.
Логіку такога кадравага рашэння крыніцы ВВС апісваюць праз прызму камерцыйных інтарэсаў вышэйшага кіраўніцтва.
Адзін з суразмоўцаў выдання параўнаў Ваганава са спрытным дзеячам пры высокім начальніку, які «ўмее накрываць на стол і паліць лазню», а таму і «кіруе фінансавымі патокамі».
Прызначэнне чалавека, які не з'яўляецца вайсковым прафесіяналам, на ключавую пасаду ў сучаснай вайне многія ўспрымаюць як дэманстратыўнае ігнараванне баявых патрэб дзеля заробку. Вайсковы інструктар Святаслаў Голікаў крытычна пракаментаваў гэтую навіну, заявіўшы, што повязь Ваганава з высокімі чыноўнікамі Мінабароны — гэта гісторыя «толькі пра камерцыю», а не пра развіццё тэхналогій ці скарачэнне страт на фронце.
Да вайны Ваганаў кіраваў дробнымі фірмамі гандлю будматэрыяламі і развядзення птушкі, а ў 2022 годзе пачаў актыўна вазіць гуманітарную дапамогу на Данбас, дзе паступова наладзіў вытворчасць дронаў «Судаплатаў».
Нягледзячы на адсутнасць досведу, яго кар'ера развівалася імкліва: у кастрычніку 2025 года патрыярх Кірыл узнагародзіў яго ордэнам, прадставіўшы пры гэтым як падпалкоўніка і дарадцу намесніка міністра абароны.
Прызначэнне Ваганава называюць адказам украінскаму камандзіру сіламі беспілотных сістэм Роберту Броўдзі («Мадзьяру»), але адказам «банальным і вульгарным».
У складзе Узброеных Сіл Украіны свае сілы беспілотных сістэм былі створаныя на загад Уладзіміра Зяленскага раней, чым да гэтага дайшлі ў Расіі — яшчэ ў лютым 2024 года. Іх першым камандзірам стаў ураджэнец Закарпацкай вобласці, венгр па паходжанні Роберт Броўдзі, вядомы пад пазыўным «Мадзьяр». За чатыры гады вайны Броўдзі вырас ад камандзіра невялікага атрада да камандзіра асобным родам войскаў, атрымаў годнасць Героя Украіны і пагоны маёра.
Калі прызначэнне Ваганава пацвердзіцца афіцыйна, ён павінен будзе атрымаць генеральскія пагоны.
Каментары