Дачка расійскага генерала, адказнага за мабілізацыю, дапамагае ўхіляцца ад войска за грошы
Маскоўская юрфірма Budovnits Family Law Agency, якая спецыялізуецца на сямейным і цывільным праве, дадаткова прапануе паслугі прызыўнікам. Сярод іх — афармленне адтэрміновак, абскарджанне позваў, афармленне броні ад мабілізацыі, а таксама юрыдычнае суправаджэнне выезду за межы Расіі, расказвае «Медуза».
Усе гэтыя пытанні курыруе супрацоўніца фірмы Кацярына Бурдзінская. Паводле даных уцечак, Кацярына Бурдзінская, верагодна, — дачка генерал-палкоўніка Яўгена Бурдзінскага, намесніка начальніка Генштаба УС Расіі.
Іх сваяцтва ўскосна пацвярджаюць тыя факты, што яна жыла з генералам у адной кватэры, нарадзілася ў Балтыйску ў перыяд, калі ён камандаваў дыслакаванай там брыгадай марской пяхоты.
З 2018 года сам генерал Бурдзінскі ўзначальвае Галоўнае арганізацыйна-мабілізацыйнае ўпраўленне Генштаба — то-бок менавіта ён адказвае за мабілізацыю і прызыў у расійскую армію.
У 2022‑м Бурдзінскі абяцаў не адпраўляць на фронт салдат тэрміновай службы, але гэта не выконвалася.
У чэрвені 2023 года Мінабароны Расіі апублікавала і тут жа выдаліла з сайта даклад Бурдзінскага пра мабілізацыю, у якім той паведамляў, што армія мае праблемы з «негатовасцю часткі грамадства да выканання воінскага абавязку». Бурдзінскі вінаваціў у гэтым «інфармацыйны ціск сеткавай блогерскай супольнасці».
У тым жа 2023‑м годзе Бурдзінскаму даручылі рэкрутынг на фронт зняволеных, пісаў тэлеграм-канал «Рыбарь», створаны былым супрацоўнікам прэс-службы Мінабароны Расіі Міхаілам Звінчуком.
У Кацярыны Бурдзінскай няма юрыдычнай адукацыі і вопыту працы юрыстам — раней яна працавала менеджарам па продажах у сферы палімераў і паліва.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары