«Ён не хоча дамаўляцца»: Трамп заявіў, што не хоча мець спраў з Зяленскім
Ён заявіў, што мірнае пагадненне з Расіяй, калі яго ўвогуле заключаць, будзе падпісана ўжо без удзелу цяперашняга ўкраінскага лідара.
Прэзідэнт ЗША Дональд Трамп у інтэрв’ю тэлеканалу Newsmax заявіў, што не хоча мець спраў з прэзідэнтам Украіны Уладзімірам Зяленскім, паколькі лічыць, што той не жадае дамаўляцца з Расіяй. Адбіццё наступу на Кіеў у пачатку поўнамаштабнага ўварвання ён назваў шанцаваннем, піша «Украінская праўда».
Паводле слоў Трампа, Зяленскі нібыта «не той чалавек, з якім нам варта мець справу». Ён заявіў, што мірнае пагадненне з Расіяй, калі яго ўвогуле заключаць, будзе падпісана ўжо без удзелу цяперашняга ўкраінскага лідара.
«Ён не хоча дамаўляцца. Ён кажа, што хоча дамовіцца, але гэта не так. Не, я не вялікі прыхільнік Зяленскага», — сказаў прэзідэнт ЗША.
Трамп таксама заявіў, што першапрычынай вайны было прэзідэнцтва Барака Абамы, падчас якога Украіну нібыта «прымусілі аддаць Крым».
Кіраўнік Белага дома назваў часова акупаваны паўвостраў «найпрыгажэйшым кавалкам зямлі», з усіх бакоў акружаным акіянам.
«Крым — гэта, безумоўна, самая каштоўная частка Украіны. З чатырох бакоў — акіян. Менавіта так. Найпрыгажэйшы кавалак зямлі. Я забудоўшчык. Я ведаю… я дакладна разбіраюся ў добрай зямлі», — заявіў Трамп.
У інтэрв’ю Трамп назваў ганьбай удары Сіл абароны Украіны па расійскіх нафтаперапрацоўчых заводах.
«Я хачу, каб Зяленскі спыніўся, і я хачу таго самага ад Пуціна. Цяпер, калі вы кажаце мне, што Зяленскі зноў наносіць удары па НПЗ, то ўсё, чаго ён гэтым дасягае, — гэта павышэнне сусветных цэн на нафту. Я лічу, што гэта проста ганьба».
Акрамя таго, паразу расійскага бліцкрыгу пад Кіевам у 2022 годзе амерыканскі лідар спісаў на ўмовы надвор’я.
«Але тады меркавалася, што гэта будзе вельмі хуткая, ведаеце, вельмі хуткая вайна. І калі вы памятаеце, як танкі рухаліся па шашы проста на Кіеў, то, калі б генерал, які, відавочна, быў не вельмі добрым генералам, не павярнуў направа на сельскагаспадарчыя ўгоддзі, наскрозь прамоклыя праз наймацнейшыя дажджы ў Кіеве… то ім (украінцам), мабыць… Я не ведаю, ці можна назваць гэта шанцаваннем, ці не, шчыра кажучы», — сказаў Трамп.
На думку кіраўніка Белага дома, Зяленскі павінен пайсці на саступкі Пуціну, бо Масква мае значна большы мабілізацыйны рэсурс у вайне на знясіленне.
«Праўда ў тым, што Расія — велізарная краіна, і Расія можа страціць мільён чалавек, а за імі стаяць яшчэ многія мільёны людзей», — заявіў Трамп.
Цяпер чытаюць
У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара8
Каментары