«Jon nie choča damaŭlacca»: Tramp zajaviŭ, što nie choča mieć spraŭ ź Zialenskim
Jon zajaviŭ, što mirnaje pahadnieńnie z Rasijaj, kali jaho ŭvohule zaklučać, budzie padpisana ŭžo biez udziełu ciapierašniaha ŭkrainskaha lidara.
Prezident ZŠA Donald Tramp u intervju telekanału Newsmax zajaviŭ, što nie choča mieć spraŭ z prezidentam Ukrainy Uładzimiram Zialenskim, pakolki ličyć, što toj nie žadaje damaŭlacca z Rasijaj. Adbićcio nastupu na Kijeŭ u pačatku poŭnamaštabnaha ŭvarvańnia jon nazvaŭ šancavańniem, piša «Ukrainskaja praŭda».
Pavodle słoŭ Trampa, Zialenski nibyta «nie toj čałaviek, ź jakim nam varta mieć spravu». Jon zajaviŭ, što mirnaje pahadnieńnie z Rasijaj, kali jaho ŭvohule zaklučać, budzie padpisana ŭžo biez udziełu ciapierašniaha ŭkrainskaha lidara.
«Jon nie choča damaŭlacca. Jon kaža, što choča damovicca, ale heta nie tak. Nie, ja nie vialiki prychilnik Zialenskaha», — skazaŭ prezident ZŠA.
Tramp taksama zajaviŭ, što pieršapryčynaj vajny było prezidenctva Baraka Abamy, padčas jakoha Ukrainu nibyta «prymusili addać Krym».
Kiraŭnik Biełaha doma nazvaŭ časova akupavany paŭvostraŭ «najpryhažejšym kavałkam ziamli», z usich bakoŭ akružanym akijanam.
«Krym — heta, biezumoŭna, samaja kaštoŭnaja častka Ukrainy. Z čatyroch bakoŭ — akijan. Mienavita tak. Najpryhažejšy kavałak ziamli. Ja zabudoŭščyk. Ja viedaju… ja dakładna raźbirajusia ŭ dobraj ziamli», — zajaviŭ Tramp.
U intervju Tramp nazvaŭ hańbaj udary Sił abarony Ukrainy pa rasijskich naftapierapracoŭčych zavodach.
«Ja chaču, kab Zialenski spyniŭsia, i ja chaču taho samaha ad Pucina. Ciapier, kali vy kažacie mnie, što Zialenski znoŭ nanosić udary pa NPZ, to ŭsio, čaho jon hetym dasiahaje, — heta pavyšeńnie suśvietnych cen na naftu. Ja liču, što heta prosta hańba».
Akramia taho, parazu rasijskaha blickryhu pad Kijevam u 2022 hodzie amierykanski lidar śpisaŭ na ŭmovy nadvorja.
«Ale tady mierkavałasia, što heta budzie vielmi chutkaja, viedajecie, vielmi chutkaja vajna. I kali vy pamiatajecie, jak tanki ruchalisia pa šašy prosta na Kijeŭ, to, kali b hienierał, jaki, vidavočna, byŭ nie vielmi dobrym hienierałam, nie paviarnuŭ naprava na sielskahaspadarčyja ŭhodździ, naskroź pramokłyja praz najmacniejšyja daždžy ŭ Kijevie… to im (ukraincam), mabyć… Ja nie viedaju, ci možna nazvać heta šancavańniem, ci nie, ščyra kažučy», — skazaŭ Tramp.
Na dumku kiraŭnika Biełaha doma, Zialenski pavinien pajści na sastupki Pucinu, bo Maskva maje značna bolšy mabilizacyjny resurs u vajnie na źniasileńnie.
«Praŭda ŭ tym, što Rasija — vielizarnaja kraina, i Rasija moža stracić miljon čałaviek, a za imi stajać jašče mnohija miljony ludziej», — zajaviŭ Tramp.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary