Hienprakuratura Ukrainy: Paraza pad Iłavajskam była spryčyniena tym, što bataljon «Prykarpaćcie» pakinuŭ pazicyi

U Hienprakuratury ličać, što 5-j bataljon terytaryjalnaj abarony «Prykarpaćcie» ździejśniŭ złačynstva, jakoje stała pieršapryčynaj sieryi padziej, jakija pryviali da trahiedyi pad Iłavajskam.

Pra heta na bryfinhu ŭ aŭtorak zajaviŭ namieśnik hienprakurora - hałoŭny vajskovy prakuror Ukrainy Anatol Macios, paviedamlaje dziaržaŭnaje ahienctva «Ukrinfarm».

«Jany (bataljon «Prykarpaćcie») ździejśnili złačynstva, bo stali pieršapryčynaj masavaha efiektu damino ŭ zonie Iłavajska», — skazaŭ Macios, dadaŭšy, što jany stajali pad Amvrosijeŭkaj.

Hałoŭny vajskovy prakuror adznačyŭ, što bataljon «Prykarpaćcie» z 326 vajskoŭcami prybyŭ da miesca niasieńnia słužby ŭ mai. «Słužyli-słužyli i zrabili toje, što zrabili, — pakinuli miesca niasieńnia słužby, ahalili fłanh i pajechali praz usiu Ukrainu sa štatnaj zbrojaj na školnych aŭtobusach», — skazaŭ Macios.

Jon adznačyŭ, što 5-y bataljon terytaryjalnaj abarony trojčy nie vykanaŭ zahadu kamandavańnia.

U pryvatnaści, kanstatavaŭ Macios, paśla pieršaha abstrełu, da jakoha bajcy bataljona nie byli hatovyja, bo nie čakali, što pa ich stralać z Rasii za 40 km, «prosta źnialisia i syšli».

Ardynarac kamandujučaha siektara dahnaŭ ich i daŭ piśmovy zahad spynicca abo pačać vykonvać choć by kamiendanckija funkcyi na hetaj miažy. Adnak bajcy pajšli dalej. Hetak ža ich spyniali i addavali zahad ŭ Dnieprapiatroŭsku, adnak bajcy bataljona jaho taksama nie vykanali, adznačyŭ jon.

«Siadajem na viertalot — kamandujučy Suchaputnych vojskaŭ, ja, moj pieršy namieśnik — lacim u Mahiloŭ, Znamienku. Pasadzili ŭ poli viertalot, idziom da ich. Jany pierakryli darohu — mnie soramna heta kazać, Kvantunskaja armija: chto pjany, bosyja, uzbrojenyja da zuboŭ, z bajavym kamplektam hranat na pojasie, nakiravali RPH na viertalot, i staršy lejtenant Pračuk, jakomu my abviaścili padazreńnie, addaŭ kamandu stralać», — raspavioŭ hałoŭny vajskovy prakuror.

Pa słovach Maciosa, kamandujučy Suchaputnych vojskaŭ zahadaŭ tady bataljonu «Prykarpaćcie» prybyć u bližejšuju vajskovuju častku, zdać zbroju, prajści miedycynskaje abśledavańnie, pamycca, pieraapranucca, atrymać kvitki na ciahnik i centralizavana adbyć dadomu.

Adnak jany i tut zrabili pa-svojmu i pajechali dadomu kałonaj z školnych aŭtobusaŭ z vybitymi šybami, 17 «Urałaŭ» i siami «adcisnutych» aŭtamabilaŭ biez numarnych znakaŭ abo sa znakami Danieckaj vobłaści, adznačyŭ hałoŭny vajskovy prakuror.

«Orhany miascovaha samakiravańnia Ivana-Frankoŭskaj vobłaści robiać ź ich hierojaŭ. Ja nie chaču skazać, što tam usie źjaŭlajucca deziercirami, zaŭsiody jość pavadyr i zaŭsiody jość tyja, chto idzie za pavadyrom», — emacyjna adznačyŭ jon.

Macios kanstatavaŭ, što bataljon mieŭ «vialikija prablemy» jašče padčas farmiravańnia Ivana-Frankoŭskim vajenkamatam.

Abureńnie vajskovaha prakurora, u pryvatnaści, vyklikaŭ toj fakt, što dla transparciroŭki bajcoŭ bataljona vajskovy kamisar vykarystaŭ školnyja aŭtobusy. Akramia taho, pa pierakanańni Maciosa, pry vyznačeńni kamandzira bataljona Ivana-Frankoŭski vajskovy kamisar pavinien byŭ «paśpieć zrazumieć, što hety čałaviek lubić ałkahol» i nie moža kamandavać takoj kolkaściu ludziej.

Žorstkija bai pad Iłavajskam praciahvalisia z 18 žniŭnia, paśla zachopu Amvrosijeŭki pała stratehičnaja vyšynia Savur-Mahiła, a 25 žniŭnia ŭkrainskija siły patrapili ŭ atačeńnie. Hetaja paraza, chaj sabie i pałkovaha maštabu, mieła vialiki psichałahičny ŭpłyŭ na ŭkrainskuju armiju, jakaja pierad tym niekalki miesiacaŭ nastupała, i paŭpłyvała na formu pahadnieńnia ab spynieńni ahniu, pra padpisańnie jakoha Rasija i Ukraina ŭ tyja dni viali pieramovy.

Kamandzir prykarpatcaŭ apraŭdvaŭ pakidańnie pazicyj tym, što ŭ ich zusim nie było ciažkaha ŭzbrajeńnia.

• 0
• 0
• 0
• 0
• 0
• 0
• 0
• 0