«Vyžyły»: u chranałahičnaj paśladoŭnaści na pryrodzie pry naturalnym aśviatleńni

Film «Vyžyły»
Žanr: tryler, drama, pryhody
Režysior: Alechandra Hansales Ińjarytu
U rolach: Leanarda Dzi Kaprya, Tom Chardzi, Donał Hlisan, Uił Poŭłtar, Poł Andersan, Krystafier Jonier, Džošua Biordž ZŠA, 156 chv.
Adznaka: 8.

Pačatak XIX stahodździa, paŭnočny zachad Amieryki. Na trapiera i śledapyta Chju Hłasa napadaje miadźviedzica. Hrupa palaŭničych dzielicca na dźvie častki, ź ciažkaparanienym Hłasam zastajucca jaho syn Choŭk i dvoje palaŭničych — Džon Ficdžerald i junak Džym Brydžar. Jany pavinny dačakać śmierci Hłasa i pachavać jaho, ale zamiest hetaha Ficdžerald zabivaje Choŭka i pierakonvaje Brydžara kinuć Hłasa. Nasupierak abstavinam śledapyt vyžyvaje i adpraŭlajecca ŭ niebiaśpiečny šlach, kab adpomścić za zabojstva syna.

Scenar zasnavany na adnajmiennym ramanie Majkła Pankie 2003 hoda i byŭ napisany Alechandra Ińjarytu i Markam Śmitam. Jon častkova vykarystoŭvaje padziei žyćcia kałanista Chju Hłasa, upieršyniu apisanyja New Dealera Federal Writers' Project u 1939 hodzie. Tady Hłasa nazvali «samym razzłavanym čałaviekam u historyi ZŠA».

U hałoŭnaj roli źniaŭsia Leanarda Dzi Kaprya. Rolu zabojcy vykanaŭ brytaniec Tom Chardzi («Šalony Maks: Daroha lutaści», 2015), a vajskoŭca — Endru Hienry, kiraŭnika toj samaj ekśpiedycyi syhraŭ irłandziec Donał Hlisan, viadomy pa roli Biła Uiźli ŭ stužcy «Hary Poter i dary śmierci».

Pavialičyć

Pa žadańni Ińjarytu film byŭ źniaty ŭ chranałahičnaj paśladoŭnaści na pryrodzie pry naturalnym aśviatleńni i biez vykarystańnia zialonych ekranaŭ. Zdymki prajšli ŭ Brytanskaj Kałumbii i Albiercie (Kanada), a taksama na poŭdni Arhienciny.

Błakitny koler zaśniežanych biaskrajnich lasoŭ u filmie pieravažaje. Padziei adbyvajucca na fonie pryrodnaha bahaćcia zachodniaj Amieryki i śmiarotnych sutyčak ź indziejcami. U filmie źnialisia niekalki maładych zorak indziejskaha pachodžańnia i šmat masoŭki.

Letaś Ińjarytu atrymaŭ «Oskara» za film «Biordmen». Sioleta režysioru dastaŭsia «Załaty hłobus» za najlepšy dramatyčny film, a Dzi Kaprya — za najlepšuju mužčynskuju rolu.

Pavodle acenak krytykaŭ, akcior, jaki piać razoŭ naminavaŭsia na «Oskar», ale ni razu jaho nie zavajavaŭ, moža atrymać čarhovuju naminacyju na abjavie śpisu 14 studzienia.

* * *

U aryhinalnaj historyi, zapisanaj u 1939 hodzie, šlach ciažkaparanienaha Chju Hłasa da najbližejšaha forta Kiova skłaŭ kala 300 km i zaniaŭ 38 dzion. Bolšuju častku šlachu jon byŭ vymušany prapaŭźci, ale ŭ darozie jamu dapamahli pryjazna nastrojenyja indziejcy. Nahnać Ficdžeralda i Brydžara śledapyt zmoh tolki praz 9 miesiacaŭ, ale da taho času jaho žadańnie pomsty zhasła.

• 0
• 0
• 0
• 0
• 0
• 0
• 0
• 0