Žycharka Bresta dabiłasia, kab u maršrutcy źniali hieorhijeŭskuju stužku
Žycharka Bresta Iryna Łaŭroŭskaja dabiłasia, kab u haradskoj maršrutcy źniali hieorhijeŭskuju stužku.
Jana źmiaściła ŭ siabie ŭ fejsbuku adkaz dyrektara kamunalnaha transpartnaha pradpryjemstva «Bresthartrans» na svaju skarhu.
Łaŭroŭskaja jechała ŭ haradskoj maršrutcy i ŭbačyła ŭ kiroŭcy na łabavym škle hieorhijeŭskuju stužku. Žančyna paprasiła jaje źniać, ale atrymała admovu ŭ hrubaj formie. Paśla hetaha jana napisała zvarot dyrektaru kamunalnaha transpartnaha pradpryjemstva «Bresthartrans».
U vyniku «Bresthartrans» i harvykankam paprasili ŭ Łaŭroŭskaj prabačeńnia. Jany taksama praviali schod, na jakim vykazalisia ab niedapuščalnaści raźmiaščeńnia ŭ hramadskim transparcie roznych ściahoŭ i relihijnaj atrybutyki.
Farmalna, pa biełaruskim zakonie aŭtamabilistam zabaroniena raźmiaščać u sałonie nalepki i abjekty, jakija zasłaniajuć ahlad.
Čorna-aranžavaja stužka vykarystoŭvałasia ŭ ordenie Śviatoha Hieorhija ŭ Rasijskaj impieryi, a taksama ŭ savieckim ordenie Słavy.
Hvardziejskaja stužka vykarystoŭvałasia ŭ SSSR u asnoŭnym dla śviatočnaha dekoru. Ale «hieorhijeŭskaj» — adkrytaja adsyłka da impierskaj historyi — jaje tady nichto nie nazyvaŭ.
U saviecki čas hałoŭnym simvałam pieramohi byŭ čyrvony ściah. Ale kali Rasija zadumała adbudovu impieryi, jon nie pasavaŭ.
Saviecki ściah? Ale nichto nie choča viartacca ŭ «savok». Rasijski trykałor? Ale jon čužy inšym narodam. Dla adradžeńnia impieryi patrebny byŭ novy simvał.
Tak u 2005 hodzie ŭ Rasii prydumali akcyju «Hieorhijeŭskaja stužačka», u ramkach jakoj da Dnia Pieramohi ŭ Vialikaj Ajčynnaj vajnie stali razdavać stužki tych ža koleraŭ.
Spačatku stužka ŭsprymałasia jak prosta znak histaryčnaj pamiaci. Adnak jana pierastała być niejtralnym simvałam, kali ŭ 2014 hodzie jana stała znakam bajevikoŭ na Danbasie.
Hieorhijeŭskuju stužku ŭ Biełarusi na 9 Maja taksama vykarystoŭvajuć. Asabliva ŭ Bresckaj krepaści, kudy štohod źjazdžajecca šmat rasijskich turystaŭ. Adnak znak pamiaci Pieramohi ŭ Biełarusi prydumali svoj: heta jabłynievy ćviet, simvał miru i nadziei.
Kamientary