Жыхарка Брэста дабілася, каб у маршрутцы знялі георгіеўскую стужку
Жыхарка Брэста Ірына Лаўроўская дабілася, каб у гарадской маршрутцы знялі георгіеўскую стужку.
Яна змясціла ў сябе ў фэйсбуку адказ дырэктара камунальнага транспартнага прадпрыемства «Брэстгартранс» на сваю скаргу.
Лаўроўская ехала ў гарадской маршрутцы і ўбачыла ў кіроўцы на лабавым шкле георгіеўскую стужку. Жанчына папрасіла яе зняць, але атрымала адмову ў грубай форме. Пасля гэтага яна напісала зварот дырэктару камунальнага транспартнага прадпрыемства «Брэстгартранс».
У выніку «Брэстгартранс» і гарвыканкам папрасілі ў Лаўроўскай прабачэння. Яны таксама правялі сход, на якім выказаліся аб недапушчальнасці размяшчэння ў грамадскім транспарце розных сцягоў і рэлігійнай атрыбутыкі.
Фармальна, па беларускім законе аўтамабілістам забаронена размяшчаць у салоне налепкі і аб'екты, якія засланяюць агляд.
Чорна-аранжавая стужка выкарыстоўвалася ў ордэне Святога Георгія ў Расійскай імперыі, а таксама ў савецкім ордэне Славы.
Гвардзейская стужка выкарыстоўвалася ў СССР у асноўным для святочнага дэкору. Але «георгіеўскай» — адкрытая адсылка да імперскай гісторыі — яе тады ніхто не называў.
У савецкі час галоўным сімвалам перамогі быў чырвоны сцяг. Але калі Расія задумала адбудову імперыі, ён не пасаваў.
Савецкі сцяг? Але ніхто не хоча вяртацца ў «савок». Расійскі трыкалор? Але ён чужы іншым народам. Для адраджэння імперыі патрэбны быў новы сімвал.
Так у 2005 годзе ў Расіі прыдумалі акцыю «Георгіеўская стужачка», у рамках якой да Дня Перамогі ў Вялікай Айчыннай вайне сталі раздаваць стужкі тых жа колераў.
Спачатку стужка ўспрымалася як проста знак гістарычнай памяці. Аднак яна перастала быць нейтральным сімвалам, калі ў 2014 годзе яна стала знакам баевікоў на Данбасе.
Георгіеўскую стужку ў Беларусі на 9 Мая таксама выкарыстоўваюць. Асабліва ў Брэсцкай крэпасці, куды штогод з'язджаецца шмат расійскіх турыстаў. Аднак знак памяці Перамогі ў Беларусі прыдумалі свой: гэта яблыневы цвет, сімвал міру і надзеі.
Цяпер чытаюць
Інфармацыю пра групу крыві будуць уносіць у беларускія пашпарты і дазволы на жыхарства7
Каментары