«Rosatam»: Pad Sievieradźvinskam vybuchnuła rakieta z radyjeaktyŭnaj krynicaj siłkavańnia, cieły zahinułych nie znajšli
U rasijskaj dziaržkarparacyi «Rasatam» zajavili, što vybuch 8 žniŭnia pad Sievieradźvinskam adbyŭsia padčas vyprabavańnia rakiety z radyjeizatopnym elemientam u ruchaviku. U vyniku vybuchu zahinuli piać supracoŭnikaŭ «Rasatama», jašče troje atrymali traŭmy i apioki roznaj stupieni ciažkaści, piša bbc.com.
«Vyprabavańni rakiety prachodzili na marskoj płatformie. Paśla zaviaršeńnia vyprabavańniaŭ adbyłosia ŭzharańnie paliva rakiety z nastupnaj detanacyjaj», — havorycca ŭ paviedamleńni viedamstva.
«Paśla vybuchu niekalki supracoŭnikaŭ byli adkinutyja ŭ mora, i była nadzieja znajści ich žyvymi. Pošuki praciahvalisia da taho času, pakul zastavałasia nadzieja znajści tych, chto vyžyŭ.
«Tolki paśla hetaha było zajaŭlena pra hibiel piaci supracoŭnikaŭ Rasatama, jakija zajmalisia pracami, źviazanymi z radyjeizatopnaj krynicaj siłkavańnia, što znachodziłasia ŭ składzie rakiety», — zajavili ŭ dziaržkarparacyi.
Radyjeizatopnyja krynicy siłkavańnia vykarystoŭvajuć enierhiju, jakaja ŭtvarajecca ŭ vyniku radyjeaktyŭnaha raspadu.
«Rosatam» apublikavaŭ imiony supracoŭnikaŭ Rasijskaha fiederalnaha jadziernaha centra — Usierasijskaha navukova-daśledčaha instytuta ekśpierymientalnaj fiziki (Saroŭ, Nižaharodskaja vobłaść), jakija zahinuli padčas vybuchu ŭ Archanhielskaj vobłaści.
Heta Alaksiej Vjušyn, Jaŭhienij Karatajeŭ, Viačasłaŭ Lipšaŭ, Siarhiej Pičuhin, Uładzisłaŭ Janoŭski.
U paviedamleńni «Rasatama» zahinuŭšych nazvali nacyjanalnymi hierojami i elitaj Saroŭskaha jadziernaha centra. Usie jany pradstaŭlenyja da dziaržaŭnych uznaharod.
Viersija z «Buravieśnikam»
Raniej Minabarony Rasiei paviedamlała, što pry vybuchu na palihonie pad Sievieradźvinskam, dzie vypraboŭvali vadkasny reaktyŭny ruchavik, zahinuli dva čałavieki.
Ekśpierty, apytanyja ahienctvam Rejter ŭ noč na subotu zaŭvažyli ŭ hetaj viersii nieadpaviednaści.
«Pry vybuchu vadkapaliŭnaha ruchavika radyjacyjnaha skačka nie adbyvajecca, a nam viadoma, što ruskija daŭno pracujuć nad niejkim jadziernym ruchavikom dla kryłataj rakiety», - skazaŭ u intervju ahienctvu člen Fiederacyi navukoŭcaŭ ZŠA Ankit Panda.
Ekśpierty vykazali zdahadku, što vypraboŭvać mahli rakietu 9M730 «Buravieśnik», pra jakuju ŭpieršyniu raspavioŭ Uładzimir Pucin u pasłańni Fiederalnamu schodu 1 sakavika 2018 hoda. ŚMI paviedamlali, što hetaja rakieta abstalavana jadziernym pavietrana-reaktyŭnym maršavym ruchavikom.
Radyjacyjny fon
U Minabarony RF raniej paviedamlali, što radyjacyjny fon paśla vybuchu byŭ u normie, škodnych vykidaŭ u atmaśfieru nie zafiksavana.
Tady ž pres-słužba administracyi Sievieradźvinska paviedamiła, što było zafiksavana karotkačasovaje pavyšeńnie radyjacyjnaha fonu.
«U 11.50 8 žniŭnia datčyki ASKRS (aŭtamatyzavanaja sistema kantrolu radyjacyjnaha stanovišča) u Sievieradźvinsku zafiksavali karotkačasovaje pavyšeńnie radyjacyjnaha fonu», - havaryłasia ŭ paviedamleńni administracyi.
Paśla hetaha fon źnižaŭsia, i na 14:00 pakazańni datčykaŭ nie pieravyšali 0,11 mikraziviertaŭ u hadzinu pry maksimalna dapuščalnych 0,6 mikraziviertaŭ u hadzinu, śćviardžali ŭ pres-słužbie.
U subotu MNS zajavili, što radyjacyjny fon u rajonach kala palihona, dzie adbyŭsia vybuch, nie pieravyšany, a paviedamleńnie pra pieravyšeńnie źnikła i z sajta haradskoj administracyi, adznačaje RBK.
Namieśnik kapitana marskoha porta Archanhielska Siarhiej Kozub paviedamiŭ RBK, što paśla vybuchaŭ vajskoŭcy začynili rajon Dźvinskaha zaliva Biełaha mora dla sudnachodstva. Pavodle jaho słoŭ, zabarona na płavańnie była ŭviedzienaja z 9 žniŭnia pa 10 vieraśnia. Kozub nazvaŭ heta «zvyčajnaj historyjaj». Port Archanhielska zastajecca adkrytym.
Viersii ŚMI
U piatnicu vydańnie Baza paviedamiła, što šaściarych paciarpiełych adpravili ŭ Maskvu samalotami sanavijacyi.
«U paciarpiełych - dva dyjahnazy. Pieršy - vidavočny: ciažkija vybuchovyja traŭmy, takija ranieńni čałaviek atrymlivaje, znachodziačysia pablizu ad miesca mocnaha vybuchu. Ale ŭ ich jość i druhi dyjahnaz: radyjacyjnaje apramianieńnie», - śćviardžała vydańnie.
Paciarpiełyja ŭ vyniku vybuchu na palihonie nakiravanyja ŭ Maskvu, paćvierdzili ŭ piatnicu ŭ pres-słužbie ŭrada rehijonu. Pry hetym tam nie ŭdakładnili, kolki paciarpiełych, u jakim stanie i ź jakim dyjahnazam.
Ahienctva Interfaks paviedamlała, što ŭ dzień zdareńnia ŭ aptekach Archanhielska rezka vyras popyt na preparaty z utrymańniem jodu.
«Učora skupili ŭsie. Spačatku jod ŭ tabletkach, jodamaryn, zatym zvyčajny jod i jodzisty kalij. Ažyjataž pačaŭsia kala 17.00 i da samaha zakryćcia ŭsio razabrali. Ludzi pierad kasaj abmiarkoŭvali naviny pra radyjacyju ŭ Sievieradźvinsku, ab vybuchu ŭ vajskoŭcaŭ», - raspaviała ahienctvu farmaceŭt adnoj z archanhielski aptek.
«MNS adpracavała instrukcyju: začynić vokny i dźviery ŭ dziciačych sadkach i balnicach, zavadskaja balnica praviała dezaktyvacyju ŭ [kaściumach] chimabarony, chvorych nie puścili da lekaraŭ, začynili šłahbaŭm dla chutkich. Pa navinach nie abviaščali, prosta abzvońvali balnicy i škoły. Dziŭna, što nie było abviaščeńnia i sireny - pavinny byli ŭklučyć pa idei, pry atrymańni vymiareńnia, što ŭ dva razy pieravyšaje narmalny radyjacyjny fon. I vulicy palivać, i travu vyvieźci z hazonaŭ. Jod i praŭda skupili», - raskazała krynica Bi-bi-si ŭ Sievieradźvinsku.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary