Hrodzieniec pradaje paštovuju marku XIX stahodździa. Prosić 1400 rubloŭ
Voś u čym jaje ŭnikalnaść.
Na Av.by źjaviłasia abjava ab prodažy pieršaj paštovaj marki Rasijskaj impieryi. Žychar Hrodna prosić za jaje 1400 rubloŭ, piša Blizko.by.
Kalekcyjanier zapeŭnivaje, što heta «lehiendarny i nadzvyčaj kaštoŭny fiłatelistyčny abjekt».
Marku ŭviali ŭ abaračeńnie cyrkularam Paštovaha departamienta Rasijskaj impieryi ad 10 śniežnia 1857 hoda (22 śniežnia pavodle novaha stylu). U tym ža miesiacy paštovyja marki pastupili ŭ prodaž i pačali vykarystoŭvacca ŭ niekatorych hubierniach.
Aficyjnaje ŭsieahulnaje vykarystańnie marak na ŭsioj terytoryi impieryi, za vyklučeńniem Kaŭkaza, Zakaŭkaźzia i Sibiry, pačałosia 1 studzienia 1858 hoda (13 studzienia pavodle novaha stylu).
Kropkavy štempiel № 240 śviedčyć pra toje, što marku pahasili na paštovaj stancyi Pałanhien (zaraz heta Pałanha ŭ Litvie).
Na advarotnym baku marki jość ekśpiertny štamp Pfenninger ad imia Franca Pfieninhiera, viadomaha niamieckaha ekśpierta ŭ halinie fiłatelii, a taksama vadziany znak u vyhladzie ličby 1.
U jakaści bonusa aŭtar abjavy prapanuje niekalki rasijskich jubilejnych marak.
Pieršyja ŭ śviecie paštovyja marki źjavilisia ŭ 1830‑ch hadach. U Rasijskaj impieryi ich aficyjna pačali vykarystoŭvać tolki ŭ 1858 hodzie. Pakolki Biełaruś u toj čas uvachodziła ŭ skład hetaj dziaržavy, pieršuju paštovuju marku Rasijskaj impieryi možna nazvać pieršaj i na biełaruskaj terytoryi.
Ciapier čytajuć
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek33
Kamientary