Piatnaccać čałaviek u centry Minska pad bieł-čyrvona-biełymi ściahami zhadali źnikłych palitykaŭ FOTA
Vybarčyja kampanii, asabliva etap zboru podpisaŭ, — čas absalutnaj palityčnaj libieralizacyi. Voś kiraŭnik AHP Mikałaj Kazłoŭ abvieściŭ praviadzieńnie pikieta la HUMa. Pryčym pieršasnaj metaj byli zusim nie podpisy, a nahadać, što dvaccać hadoŭ tamu byli vykradzienyja i zabityja Viktar Hančar i Anatol Krasoŭski.
Sabrałasia kala piatnaccaci čałaviek. Prykładna stolki ž było i ściahoŭ. Samych roznych: i AHP, i BCHD, i Narodnaj hramady, i z varyjacyjaj «Pahoni», jakuju vykarystoŭvajuć aktyvisty «Jeŭrapiejskaj Biełarusi» ŭ svaich pikietach.
Mikrafon u ruki ŭziaŭ Maksim Viniarski (kali chto nie viedaje, to heta taki vołat supracivu, aktyvist «Jeŭrapiejskaj Biełarusi», jaki sioleta bałatujecca pa toj ža akruzie, dzie madelka Maryja Vasilevič).
Trymajučy levuju ruku ŭ kišeni, Maksim pačaŭ rezać u mikrafon: «20 hadoŭ tamu eskadronami śmierci byli skradzienyja i zabityja Viktar Hančar i Anatol Krasoŭski. Pierad hetym byŭ zabity Juryj Zacharanka, źniščany žurnalist Źmicier Zavadski. Taksama byŭ zabity Hienadź Karpienka, jaho śmierć była vyhadnaja ŭładam. Byŭ zabity Aleh Biabienin, jahonaja śmierć była insceniravanaja pad samahubstva. Za ŭsie hetyja zabojstvy daviadziecca adkazać».
U hety čas z prajhravalnika zajhrała himnavaja muzyka: «Adkažy pierad narodam boskim, adkažy, chłuślivy vaładar, dzie ciapier Zacharanka, Krasoŭski, dzie ciapier Zavadski i Hančar?».
Ščyra kažučy, vialikaj cikavaści dadzienaja akcyja ŭ minčukoŭ nie vyklikała. Maksimum — jany zdymali na mabiłki i chucieńka išli dalej pa svaich spravach. «Davaj chutčej adsiul, a to milicyja zabiare», — šušukalisia piensijaniery na prypynku.
Milicyja nie prajaŭlała da hetaj aktyŭnaści nijakaha intaresu. Niekalki cicharoŭ, kaniečnie, dziažuryli pobač, ale nie padychodzili da ŭdzielnikaŭ. Mima praniośsia były pres-sakratar MUS Hieorhij Jaŭčar. Zdajecca, jon navat nie zirnuŭ na pikiet.
Ciapier čytajuć
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary