Pazoŭ Mininfarma suprać Tut.by: u sudzie kažuć, ŚMI parušyła prava čytačoŭ na dakładnuju infarmacyju ab dziaržorhanach

24 listapada ŭ Ekanamičnym sudzie Minska byŭ adnoŭleny praces pa spravie Tut.by, što abskardžvaje pazoŭ Mininfarma ab pazbaŭleńni partała statusu ŚMI. Pradstaŭnik dziaržorhana nastojvaje na raniej vystaŭlenych patrabavańniach, kaža, što niedakładnaja infarmacyja mahła nanieści škodu dziaržaŭnym i hramadskim intaresam, było parušana kanstytucyjnaje prava hramadzian na atrymańnie praŭdzivaj infarmacyi ab dziejnaści dziaržorhanaŭ. U sudzie prahučali ahulnyja farmuloŭki, biez kankretyzacyi, pra jakuju kankretnuju škodu idzie havorka. Praces viadzie sudździa Ivan Majsiejčyk, piša Tut.by.

Pavialičyć

Pačynajučy z 7 žniŭnia 2020 hoda Tut.by atrymaŭ čatyry papiaredžańni. Pretenzii ad viedamstva pryjšli paśla materyjałaŭ «U siem razoŭ bolš vybarščykaŭ i «tajemnyja» pratakoły. Jakija parušeńni ŭbačyli naziralniki i što skazaŭ CVK?», «Kamitet dziaržkantrolu zmoža vypłacić bujnyja premii rabotnikam, jakija prajaviać siabie ŭ rezanansnych spravach», «Da redaktara Tut.by pryjšli siłaviki. Na jaje dačku zaviali kryminalnuju spravu ab masavych biesparadkach» i «Biełaruskaja mytnia paprasiła paćvierdzić, što ŭ «Hary Potery» niama zaklikaŭ da źviaržeńnia ŭłady».

Stracić status ŚMI možna paśla vyniasieńnia dvuch i bolš piśmovych papiaredžańniaŭ na praciahu hoda.

18 vieraśnia Ministerstva infarmacyi źviarnułasia ŭ sud z pazovam ab spynieńni vypusku sietkavaha vydańnia Tut.by. Paśla hetaha, 29 vieraśnia, redakcyja atrymała zahad ministra infarmacyi Ihara Łuckaha: z 1 kastryčnika Tut.by časova pazbaŭlajecca statusu ŚMI.

Tut.by nie zhodny z vyniesienymi papiaredžańniami i abskardziŭ ich u Viarchoŭnym sudzie, papiaredžańnie pa materyjale «Da redaktara Tut.by pryjšli siłaviki. Na jaje dačke zaviali kryminalnuju spravu ab masavych biesparadkach» pryznana niesapraŭdnym.

Intaresy Tut.by abaraniajuć hienieralny dyrektar TAA «TUT BAJ miedyja» Ludmiła Čekina i advakat Siarhiej Zikracki. Jurydyčnuju padtrymku ŭ farmiravańni pravavoj pazicyi Tut.by taksama akazvaje kamanda jurydyčnaj firmy «Alejnikaŭ i Partniory» ŭ składzie staršych jurystaŭ Hanny Cymbalist i Ksany Sidaruk.

Intaresy Ministerstva infarmacyi ŭ Ekanamičnym sudzie Minska, jak i ŭ Viarchoŭnym sudzie, pradstaŭlaje advakat i partnior advakackaha biuro «Pryncypał» Taćciana Špileŭskaja. Na jaje dumku, nazvanyja publikacyi parušajuć kanstytucyjnyja pravy hramadzian — prava na dakładnuju infarmacyju ab dziejnaści dziaržaŭnych orhanaŭ, mohuć nanieści škodu dziaržaŭnym i hramadskim intaresam.

Advakat Siarhiej Zikracki z hetym nie pahadziŭsia:

— Na siońnia jość try papiaredžańni ŭ adras Tut.by. Usie jany datyčacca niaznačnych niedakładnaściaŭ, jakija ŭtrymlivalisia ŭ materyjałach. Niedakładnaści byli apieratyŭna likvidavanyja i nie pryčynili škodu dziaržaŭnym i hramadskim intaresam. Tut.by — samaje papularnaje ŭ Biełarusi sietkavaje vydańnie. Miarkujem, što pazbaŭleńnie statusu ŚMI moža paciahnuć parušeńnie pravoŭ hramadzian na dostup da infarmacyi, pakolki supracoŭniki Tut.by nie buduć źjaŭlacca žurnalistami, jak heta praduhledžana ŭ zakonie «Ab ŚMI», jany buduć abmiežavanyja ŭ šerahu pravoŭ pa zbory i raspaŭsiudžvańni infarmacyi. Akramia taho, pazbaŭleńnie statusu ŚMI niehatyŭna adabjecca na infarmacyjnym składniku ŭ krainie, pamienšyć značeńnie biełaruskich miedyja, a heta supiarečyć kancepcyi nacyjanalnaj biaśpieki, dzie padkreślivajecca nieabchodnaść raźvivać nacyjanalnyja ŚMI, abaraniać nacyjanalnyja rynki infarmacyjnych pasłuh.

Baki vykazali pazicyju pa pazovie, na hetym papiaredniaje sudovaje pasiadžeńnie pa spravie było skončana. Sudovaje raźbiralnictva praciahniecca 3 śniežnia.

• 0
• 0
• 0
• 0
• 0
• 0
• 0
• 0