EPAM zaklučyła šmathadovaje partniorstva z Anthropic, buduć ukaraniać Claude
U EPAM udakładnili, što dziakujučy partniorstvu dapamohuć karparatyŭnym klijentam ukaraniać Claude, raspracavany kampanijaj Anthropic, u realnyja biznes-pracesy, piša Office Life.
Heta aznačaje, što buduć spraščać składanyja sastarełyja apieracyi, aŭtamatyzavać pracoŭnyja pracesy, analizavać vialikija masivy danych. Zrobiać heta za košt inžyniernaha dośviedu EPAM i madelaŭ Claude, Claude Code i Claude Agent SDK ad Anthropic.
U pres-relizie skazana, što EPAM farmuje śpiecyjalnaje padraździaleńnie z bolš jak 10 tysiač architektaraŭ, siertyfikavanych pa Claude, uklučajučy 250 śpiecyjalizavanych inžynieraŭ. Siertyfikacyju ŭžo prajšli bolš za 1,3 tysiačy čałaviek, a da kanca III kvartała ich pavinna stać 5 tysiač. Jašče tysiačy takich śpiecyjalistaŭ padrychtujuć u 2027 hodzie. Paralelna bolš za 20 tysiač supracoŭnikaŭ EPAM prajšli navučańnie praz Anthropic Academy.
Pavodle słoŭ Elejny Šechter, dyrektara pa stratehii i transfarmacyi EPAM, partniorstva z Anthropic — važnaja viecha ŭ misii kampanii pa pieratvareńni ŭ viadučaha pastaŭščyka stratehičnych pasłuh, aryjentavanych na II, dla klijentaŭ sa śpisu Global 2000.
Anthropic — heta viadučaja amierykanskaja kampanija ŭ halinie štučnaha intelektu, stvoranaja ŭ 2021 hodzie byłymi supracoŭnikami OpenAI, jakaja raspracavała ChatGPT.
Kamientary