18-hadovamu žycharu Mahilova dali dva miesiacy aryštu za palityčnyja nadpisy na asfalcie
Siońnia ŭ sudzie Leninskaha rajona Mahilova vyniesieny prysud 18-hadovamu Siarhieju Turunovu, jakoha pryznali vinavatym u psavańni majomaści i naniasieńni škody darožna-mastavomu pradpryjemstvu na sumu 56 rubloŭ 73 kapiejki.
Chłopiec u adnym sa spalnych rajonaŭ horadu ŭ razhar letašnich pratestaŭ napisaŭ farbaj na asfaltavym pakryćci i leśvicy ličby «Z%» i «80%». U jaho dziejańniach uhledzieli złačynstva i abvinavacili ŭ parušeńni 341 artykułu Kryminalnaha kodeksu («Apahańvańnie i psavańnie majomaści»), paviedamlaje Radyjo Svaboda.
11 sakavika sudździa Aksana Ratnikava ŭ sudzie Leninskaha rajonu Mahilova pastanaviła pakarać Turunova 2 miesiacami aryštu i prysudziła vypłacić škodu kamunalnamu pradpryjemstvu. Ciaham 10 dzion abvinavačany maje prava abskardzić prysud, što jon i budzie rabić. Pakul ža vyrak nie nabyŭ moc. Tyja 10 dzion adviedzieny na pahašeńnie pazoŭnych patrabavańniaŭ.
Svaju vinu Turunaŭ pryznaŭ i raskajaŭsia, razam z tym nie pahadziŭsia, što raśpisvaŭ chodniki z hrupaj asobaŭ. Pavodle jaho, nadpisami jon vykazvaŭ niazhodu z vynikami prezydenckich vybaraŭ. Advakatka prasiła sud ab pabłažcy padabaronnamu, zaznačyŭšy, što jon pakutuje ad psychičnaha rasstrojstva.
Dziaržaŭnaje abvinavačańnie prasiła asudzić Turunova na 3 miesiacy aryštu. Prakurorka adznačyła, što padsudny nia vypłaciŭ škodu kamunalnamu pradpryjemstvu, a značyć, nie ŭśviadomiŭ viny i nie raskajaŭsia. Pavodle jaje, nadpisy byli naniesienyja ŭ hramadzkim miescy i ich mahli bačyć inšyja asoby. Akramia taho, pasudny byŭ napadpitku, što abciažarvaje vinu.
Jak vynikaje z materyjałaŭ spravy, abvinavačany zrabiŭ złačynstva ŭ stanie alkaholnaha apjanieńnia ŭ hrupie niavyznačanych asobaŭ u noč z 14 na 15 žniŭnia. Chłopca zatrymaŭ staršy praparščyk unutranych vojsk Jaŭhien Marčanka, jaki vyklikaŭ milicyju.
Turunova spačatku aštrafavali za znachodžańnie ŭ hramadzkim miescy ŭ stanie alkaholnaha apjanieńnia, a ŭ kancy listapada 2020 hodu suprać jaho raspačali kryminalnuju spravu za psavańnie majomaści. Za praminuły čas ad nadpisaŭ mała što zastałosia. Pakarańnie dla Turunova pačniecca z momantu jahonaha zatrymańnia.
Padrabiaźniej pra abstaviny spravy čytajcie:
U Mahilovie sudziać 18-hadovaha chłopca za nadpisy na asfalcie, jakija daŭno zmylisia
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie61
Kamientary